DILI, (TATOLI) – Sekretária Estadu Igualidade no Inkluzaun (SEII), liuhusi Diresaun Nasionál Abordajen Integradu Jéneru (DNAIJ) hamutuk ho Organizasaun Nasaun Unida (ONU), UN Women inklui UNFPA (Fundu Populasaun Nasaun Unida-sigla inglés) realiza workshop nasionál ba loron ida hodi halo konsultasaun nasionál kona-ba implementasaun Planu Asaun Anuál (PAA), Violénsia Bazea ba Jéneru (VBJ), 2017-2022.
Objetivu jerál husi atividade ne’e hodi hametin resposta multi-setorál ba violénsia bazea ba jéneru hasoru feto no labarik feto sira iha Timor-Leste iha kontestu PAN VBJ 2017-2022.
Objetivu espesífiku mak revee progresu, fahe atinjimentu no lisaun sira hodi hametin resposta multi-setorál ba violénsia bazea ba jéneru hasoru feto no labarik feto sira iha Timor-Leste.
Atu identifika pasu sira tuir mai hodi hametin implementasaun PAA, VBJ no identifika área sira ba apoiu konjunta ONU nian hodi hatan VBJ hasoru feto no labarik feto sira.
Sekretária Estadu Inkluzaun no Igualidade, Maria José da Fonseca de Jesus, katak workshop ne’e atu fahe hanoin atu halo serbisu, apoiu ba vítima sobrevivente sira husi violénsia ninian.
“Ha’u hanoin tempu ona, atu ita dehan violénsia ne’e la di’ak, estraga ita-nia sosiedade, estraga ita-nia ema”, friza Sekretária Estadu perante mídia sira iha ótel Timor, ohin.
Enkuantu, Sunita Caminha, reprezentante UN Women iha Timor-Leste iha nia diskursu hateten workshop ne’e iha oportunidade atu aprende, hahú iha tinan ida ne’e, lori vizaun ba iha asaun.
“Iha oportunidade atu aprende husi tempu pasadu, aprende husi sobrevivente violénsia no ita-nia maluk sira ne’ebe fó apoiu ba asuntu”, dehan Sunita Caminha.
Nia akresenta bainhira haree ba kotuk, progresu barak ne’ebé selebra iha Timor-Leste, hanesan planu foun, lei foun, dezenvolvimentu foun, sistema foun nomós kapasidade.
“Maibé iha dezafiu foun ne’ebé kontinua nafatin, relasiona ho koordenasaun, alokasaun, rekursu ne’ebé adekuada no oinsa ita bele hamenus violénsia no proteje ita-nia labarik no juventude sira hodi labele haree violénsia hanesan buat babain”, dehan reprezentante ne’e.
Nia konsidera kustu husi violénsia aas tebes. “Ita mós hatene katak ita hasoru malu dala ida de’it iha tinan ida nia laran ka ita hasa’e koñesimentu de’it katak violénsia ne’e krime ka halo formasaun de’it, ida ne’e la halo mudansa ba realidade ba feto no labarik feto ne’ebé hasoru violénsia bazea ba sira-nia identidade jéneru”, katak tan.
Nia katak atu garante liberdade husi VBJ, tenke tau hamutuk esforsu sira, nune’e ho partisipasaun sira, ita iha oprtunidade atu hametin ligasaun ba malu, haree fila fali no revitaliza ita-nia parseria no identifika prioridade ne’ebé komun, ne’ebé ita bele fahe ba tinan ida ne’e nia laran.
“UN Women iha Timor-Leste sente orgullu hodi sai parseiru ba jornada ida ne’e, apresia lideransa Sekretária Estadu Igualidade no Inkluzaun no ema hotu ne’ebé partisipa iha diskusaun”, apresia Sunita.
Workshop loron ida ba konsultasaun nasionál ne’e, tuir alvu ne’ebé iha mak governu, liña interministeriál sira, reprezentante husi munisípiu 13-pontu fokál SEII nian (13), pontu fokál Ministériu Solidariedade Sosiál (MSS), GBF nian (13) no seluk tan, organizasaun sosiedade sívil sira-ema na’in 30 (Alola, Fokupers, Alfela, JSMP, Mane ho Vizaun Foun, TAF, TLMDC, Plan, Care, World Vision, WWCTL, Ba Futuru, Belun, Arco-íris, ADTL, RHTO, TLM-TL, CBRN, Rede Feto, Acbit, Codiva, AEMTL, PDHJ, Estrela+, Hatutan, Casa Vida,, Pradet, PHD, Uma Mahon Salele (Suai), Forum Peduli Wanita Oe-Cusse, Uma Mahon Paz (Baucau), etc).
Kustu ba workshop ne’e tuir estimasaun ne’ebé mak TATOLI asesu, totál $7.546.40. Ho ezekusaun hanesan; ba fatin no hahan $3.755.00, ba tradusaun no ekipamentu $450,00, imprime no fornesimentu sira $500.00 ho kuantidade idaida no DSA ba partisipante husi munisípiu, $40,00 kada loron to’o iha Dili (100%) no loron workshop, $35.20 (porsentu 88); porsentu 75.20.
Jornalista: Rafy Belo
Editora: Rita Almeida
