Enkontru membru Konsellu Estadu. Imajen Tatoli/António Gonçalves

DILI, (TATOLI) – Reuniaun entre membru Konsellu Estadu ne’ebé prezide hosi Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, tersa ne’e taka ba públiku.

Asesór Polítiku ba Prezidente Repúblika, Gregória de Sousa, ba jornalista sira hateten reuniaun ne’e asuntu ida segredu entaun buat ne’ebé Konsellu Estadu ko’alia ne’e proibe fó sai ba públiku.

Nia esplika enkontru ne’e atu konsulta polítika ba Prezidente Repúblika relasiona ho asuntu nasionál molok foti desizaun, liu-liu liga ba orsamentu jerál Estadu (OJE) 2019 ne’ebé oras ne’e sai debate públiku.

“Ita hotu hatene ona katak OJE 2019 maka agora asuntu manas. Prezidente Repúblika iha semana kotuk rona jurista sira, akadémiku, sosiedade sivíl, emprezáriu, konfisaun relijioza, entaun ohin mós  nia hakarak rona Konsellu Estadu nia hanoin”, Gregório tenik.

Kompozisaun membru Konsellu Estadu maka Prezidente Repúblika, Francisco Guterres Lú Olo, eis Prezidente Repúblika, Kay Rala Xanana Gusmão, eis Prezidente Repúblika, José Ramos Horta, Primeiru Ministru, Taur Matan Ruak, Prezidente Parlamentu Nasionál, Arão Noé de Jesus.

Eduardo de Deus Barreta ‘Dusae’, Aurora Ximenes, José Cornélio Guterres, Arcângelo de Jesus Gouveia Leite, José dos Santos ‘Naimori Bucar’ ne’ebé eleitu husi Parlamentu Nasionál.

Oscar Lima, Faustinho Godingho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes ne’ebé Prezidente Repúblika mak nomea.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here