Husi Karuk ba loos, Xefe Gabinte Komunikasuan no Informasaun, Agostinho Castro, Diretór Jerál Orsamentu Estadu Interinu MF, Salomão Yaquim no Xefe Unidade Sistema Integradu Informasaun Jestaun Finanseira , Joanico Pinto, banihira halo Konfrénsia imprensa kona-ba DOT janeiru nian. Foto/MF.

DILI, (TATOLI) – Ministériu Finansas (MF) ohin fahe ona Dotasaun Orsamentu Temporária (DOT) ba fulan janeiru nian ba liña ministeriál, instituisaun Estadu, Servisu Fundu Autónoma no Servisu Munisipál ho montante milliaun $71,9.

Diretór Jerál Orsamentu Estadu Interinu MF, Salomão Yaquim, hatete iha reuniaun konsellu ministru estraordinária iha 9 janeiru deside katak fulan ne’e sei aplika DOT hodi hein promulgasaun Orsamentu Jerál Estadu 2019 husi Prezidente Repúblika.

“Bazea ba desizaun konsellu ministru, ohin, ita hahú halo lansamentu ba rejime duodésimu fulan-janeiru ho montante millaun 71,9. Rejime duodesimál ida ne’e ita aplika ba saláriu no vensimentu, bens no servisu ho transferénsia públika”, katak nia iha Aitarak-Laran, ohin.

Nia hatutan: “Ba kapitál menór sei la aplika tanba ne’e prosesu ketak ida bainhira Orsamentu Jerál Estadu 2019 promulga maka ita foin bele asesu tama to’o iha ne’ebá. Kapitál dezenvolvimentu maski ita hatene iha projetu sira la’o hela para atu selu, maibé iha janeiru ne’e ita seidauk bele aplika, depois de hein bainhira maka desizaun polítika foti oinsá tetu ho ita-nia kapasidade orsamentu ne’ebé iha”.

Tanba ne’e ba kategoria tolu ne’e aloka ba saláriu no vensimentu ho montante milliaun $16,7, bens no servisu milliaun $28,9 no transferénsia públika milliaun 26,2 no ida ne’e inklui ona ho fundu dezenvolvimentu kapitál umanu ba fulan ida ne’e distribui milliaun $1,316,175.

“Despeza ba DOT ida ne’e nia aplikasaun hanesan mós ita adota iha 2018 katak montante milliaun 71.9 ne’e só aplika dentru fulan ida katak to’o 31 janeiru remata no lalori ba períodu seluk”, esplika.

Nia dehan tan: “Nia regra atu utiliza hodi gasta iha janeiru ne’e nafatin dekretu lei ezekusaun 2018 ne’ebé iha depois sei iha tan regra balun ne’ebé konsellu ministru deside ona depois sei fahe tan ba liña ministeriál sira atu fortifika lei ida ne’e. Ita aplika ida ne’e lasees husi lei orsamentu no jestaun finanseira ne’ebé hatuur iha artigu 31 numeru 13/2009”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here