Xefe Gabinte Komunikasuan no Informasaun, Agostinho Castro, Diretór Jerál Orsamentu Estadu Interinu MF, Salomão Yaquim no Xefe Unidade Sistema Integradu Informasaun Jestaun Finanseira , Joanico Pinto, bainhira halo Konfrénsia imprensa kona-ba DOT janeiru nian. Foto/MF

DILI, (TATOLI) – Ministériu Finansas (MF) liuliu Unidade Sistema Integradu Informasaun Jestaun Finanseira (USIIJF) bolu atensaun ba diretór administrasaun no finansas kada instituisaun no ajénsia Estadu sira atu kontrola nia despeza.

Xefe Unidade Sistema Integradu Informasaun Jestaun Finanseira, Joanico Pinto, hatete pontu importante ne’ebé iha hodi bolu atensaun diretór administrasaun no finansas iha instituisaun Estadu hotu maka haree ba pasadu, aprende husi esperiénsia Dotasaun Orsamentu Temporária (DOT) iha tinan kotuk nian.

“Ha’u hanoin importante tebes ida-idak tenke hatene iha nia ministériu liuliu ninia orgánika ne’ebé aprovadu husi konsellu ministru katak diresaun sira ne’ebé afetadu signifika iha orsamentu 2018 ou estrutura 2018 iha, maibé ba orsamentu 2019 ne’e lakon ou laiha, favór ida kontrola nia despeza para depois bainhira Orsamentu Estadu 2019 ne’e hetan promulgasaun husi Prezidente Repúblika labele iha difikuldade ba ita atu halo rekonsiliasaun, liuliu atu enkuadra orsamentu ne’e ba iha sistema hodi hala’o nia prosesu ezekusaun”, Joanico informa iha Aitarak-Laran ohin.

Joanico Pinto hatete fó hanoin ba sira ne’ebé halo jestaun ba finansas iha kada instituisaun ne’e tanba normalmente hatene liu sira-nia orgánika ministériu.

“Naturalmente orgánika ne’e maka define minstériu ne’e iha 2018 iha diresaun sanulu, ezemplu iha 2019 iha diresaun sia de’it signifika ida halakon entaun ba sira ne’ebé maka iha kazu hanesan ne’e iha ninia ezersísiu ezekusaun orsamentál ba DOT ne’e tanba DOT ne’e foti husi 2018 nian”, katak.

Nia hatutan tan: “Signifika refleta ba estrutura anteriór entaun sira tenke tau iha konsiderasaun didi’ak para labele gastu hanesan esperiénsia ne’ebé hetan iha tinan kotuk, balun gasta menus liu balun aloka ki’ik liu entaun ita labele repete. Kuandu Orsamentu 2019 hetan promulgasaun karik fasil liu ita halo rekonsilia entre gastu DOT versus orsamentu 2019”.

Nia hatutan bainhira simu proposta DOT ba janeiru 2019 en termu importasaun dadus, konfigurasaun sistema halo prontu ona iha horisehik.

“Depois ita sei loke sistema iha tempu badak ba públiku para bele utiliza hodi hahú ezekusaun ba períodu fulan-janeiru nian”.

Iha tempu badak MF iha obrigasaun atu organiza sesaun traballu ida ho diretór sira ne’ebé fundamentál iha área finansas ne’e atu partilla mudansa balun ne’ebé akontese.

“Mudansa ne’e maka Ministériu Finansas atu kumpri rekomendasaun ou pareser ne’ebé Câmara das Contas hato’o iha relatóriu konta jerál Estadu 2016 to’o 2017 ninia liuliu rekomendasaun número nove, husu ba Governu liuliu Ministériu Finansas atu aplika kontrolu despeza iha nivel iten (item iha inglés)”, katak.

“Atualmente nivel kontrolu ne’e ita aplika iha nivel kategoria signifika kuandu item sira iha dentru kategoria ne’e instituisaun Estadu ida-idak iha fleksibilidade atu halo over spending, maibé tanba rekomendasaun Câmara das Contas husu atu aplika nivel kontolu ne’e iha nivel item signifika ninia efeitu ne’e bainhira ami aplika nia kontolu iha item kuandu atu halo gastu liu iha item ruma sira presiza halo ezersísiu estra ida ne’ebé hanaran halo transferénsia tantu iha sistema”.

Tanba ne’e mekanizmu operasionál sira MF sei halo definisaun depois sei divulga ba kada ministériu no instituisaun sira, maibé importante maka iha tinan ne’e hahú introdús ninia kontrolu ne’e la’ós ona iha kategoria despeza mas iha item.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here