Komandante Operasaun Servisu Migrasaun, Inspetór Polísia, Fortunato Fausto Guterres. Imajen Agapito dos Santos

DILI, (TATOLI) – Tuir relatóriu tinan 2018 hosi departementu operasaun servisu migrasaun, Ministériu Interiór rejista sidadaun estranjeiru hamutuk 1087 maka uza vistu turista hodi servisu iha Timor Leste.

Tuir lei númeru 9/2003 no lei númeru 11/2017 fó kompeténsia ba Servisu Migrasaun liuhosi departementu operasionál hodi kontrola no fiskaliza  sidadaun estranjeiru ne’ebé tama, hela no sai iha teritóriu.

Bazea ba dadus ne’ebé TATOLI asesu hosi Komandante Operasaun Servisu Migrasaun, Inspetór Polísia, Fortunato Fausto Guterres, hatete ninia parte rejista sidadaun Indonézia hamutuk 638, Xina 253, Filipina 80, Bangladexe 15, Srilanka neen, Índia 16, Malázia 10, Kamboja ualu, Vietname 12, Mianmar 8, Brazíl lima, Pakistaun haat no nasaun sira seluk tan maka viola vistu durante tinan kotuk.

Hosi total númeru  infratór, ne’e  ema 81, mane 60 no feto 21 tenke abandona voluntariamente ho prazu loron 10 hodi sai hosi teritóriu tanba la-selu multa.

“Ema kuaze 888 resin maka kumpre selu multa hodi deposito ba kofre Estadu”, katak Fortunato Fausto Guterres ba TATOLI iha edifisiu Ministériu Interiór Villa Verde, ohin.

Sidadaun rai liur ne’ebé viola vistu, maioria servisu iha kompañia timoroan iha área konstrusaun sivíl no loja sira.

Tuir lei migrasaun, infratór sira ne’ebé servisu  no loke kompañia privada tenke multa osan  ho montante  hosi $250 to’o $1000. Enkuantu kompañia ne’ebé emprega traballadór rai liur tenke multa $750 kada traballadór.

Maibé ba sira ne’ebé la kumpre hodi selu multa tenke abandona voluntarimente hosi teritóriu ho prazu loron 10  no bandu atu labele tama Timor-Leste durante tinan rua.

Atu servisu ho legál, lei migrasaun azilu 11/2017 fó oportunidade ba sidadaun estranjeiru hodi hatama rekerementu bazea ba kritéria no regulamentu ne’ebé vigora.

Kritéria atu hetan vistu servisu maka rekerente tenke iha abilidade servisu iha área espesífiku, aprezenta karta komportamentu di’ak hosi nasaun orijen, atestadu médiku, kontratu servisu hosi kompañia no legaliza hosi Sekretáriu Estadu Formasaun Profesionál no Empregu (SEFOPE), deklarasaun Xefe Suku no prenxe formuláriu hosi diresaun  Konsulár Ministériu Negosiu Estranjeiru no Kooperasaun hodi hetan vistu.

Nune’e mós vistu ba sidadaun estranjeiru ne’ebé estuda iha Timor, kriteria hanesan maibé tenke aprezenta mós deklarasaun rekoñesementu hosi Ministériu Edukasaun.

Alende ne’e iha mòs vistu desportu  ba desportivas estanjeiru ne’ebé hetan kontrata hosi klube timoroan hodi hela iha Timor.

“Maibé ba kazamentu mistu fen ou laen timoroan, tenke trata autorizasaun rezidénsia hodi justifika katak kaben ho timoroan hodi labele hela ho ilegál, kritéria seluk mós maka tenke iha pasaporte válidu, vistu entrada, atestadu médiku, komportamentu di’ak, deklarasaun suku, sertidaun kazamentu, fen ou laen timoroan ne’e tenke iha billete identidade”, tenik nia.

Sidadaun rai liur hamutuk 60 resin hosi Vikeke no Dili maka migrasaun notifika iha 2018 atu prenxe autorizasaun rezidénsia hodi hela ho legál tanba kaben ho timoroan hahú kedas hosi okupasaun Indonézia no depois restaurasaun independensia 2002.

Nia esplika durasaun vistu ba turista sira durante loron 30 hodi hela iha teritóriu no iha posilidade hanaruktan ba loron 90, ba vistu servisu durasaun tinan ida.

“Ohin nia hetan vistu tinan ida depois sai tiha ba liur fulan liima ou neen mai fali entaun labele atu halo estensaun ba vistu maibé halo pedidu foun”, tenik tan.

Inspetór polísia ne’e hateten tarefa orsamentu ba vistu hanesan vistu turista $30, vistu servisu hahú hosi $40 to’o 50 no estensaun iha diferente. Sidadaun Indonézia maioria hetan vistu servisu, depois Xina, Filipina no nasaun sira seluk.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here