Enkontru membru Konsellu Estadu. Imajen Tatoli/António Gonçalves

DILI (TATOLI)—Prezidente Repúblika, Francisco Guterres Lú Olo, sei rona membru Konsellu Estadu nia hanoin kona-ba orsamentu jerál Estadu (OJE)  2019 iha Palásiu Prezidente Nicolau Lobato, Bairru Pité, Tersa (15/1).

Tuir informasaun ne’ebé Ajénsia Tatoli asesu hosi Mídia Prezidénsia Repúblika iha segunda loraik ne’e katak objetivu rona membru Konsellu Estadu tanba membru Konsellu Estadu nu’udar orgaun konsulta polítiku ba Prezidente Repúblika, ho ida ne’e PR rona sira nian opiniaun sira relasiona ho asuntu nasionál molok foti desizaun.

Prezidente Repúblika maka sei prezide Konsellu Estadu ho pontu úniku Orsamentu Jerál Estadu 2019.

Molok hahú reuniaun, Prezidente Repúblika mós sei fó tomada pose ba membru Konsellu Estadu na’in-tolu maka hanesan Eduardo de Deus Barreto ‘Dusae’, José Cornélio Guterres no Arcângelo de Jesus Gouveia Leite ne’ebé eleitu husi Parlamentu Nasionál.

Kompozisaun membru Konsellu Estadu maka Prezidente Repúblika, Francisco Guterres Lú Olo,eis Prezidente Repúblika, Kay Rala Xanana Gusmão, eis Prezidente Repúblika José Ramos Horta, Primeiru Ministru Taur Matan Ruak.

Prezidente Parlamentu Nasionál, Arão Noé de Jesus,  Eduardo de Deus Barreta ‘Dusae’, Aurora Ximenes, José Cornélio Guterres, Arcângelo de Jesus Gouveia Leite, José dos Santos ‘Naimori Bucar’ ne’ebé eleitu husi Parlamentu Nasionál no Oscar Lima, Faustinho Godingho Gonçalves da Costa, Alcino de Araújo Barris, Maria Dadi Soares Magno no Laura Soares Abrantes ne’ebé Prezidente Repúblika foti.

Prezidente Repúblika simu Lei orsamentu jerál Estadu 2019 ho montante $ 2.1 biloens husi Parlamentu Nasionál iha 24 Dezembru 2018. Prezidente Repúblika sei iha loron 30 atu estuda molok foti desizaun.

Molok hala’o reuniaun Konsellu Estadu, Prezidente Repúblika rona ona entidade oi-oin nia hanoin kona-ba orsamentu jerál Estadu hosi Konsellu Konsultivu Fundu Petrolíferu, organizasaun sosiedade sivíl, jurist sira, akadémiku, konfisaun relijioza, Câmara Comércio e Industria Timor-Leste, Banku Sentrál Timor-Leste,  hosi 7-10 Janeiru 2019. 

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here