Forsa Komponente Naval na’in tolu hala’o formatura iha seremónia aniversáriu Komponente Naval ba dala 17 iha Baze Naval Hera, sábadu semana kotuk. Imajen Palásiu PR

DILI (TATOLI)— Prezidente Repúblika, Francisco Guterres Lú Olo, alerta ba Komponente Navál tenke kontribui ho nia esperiénsia, matenek no meius ba hala’o vijilánsia no fiskalizasaun iha área-tasi ne’ebé boot, tama iha soberania no jurizdisaun nasionál.

“Ita presiza hadi’a kondisaun manutensaun ba frota navál iha rai-maran no hasa’e liu-tan kapasidade vijilánsia no fiskalizasaun ba área tasi nian ne’ebé tama iha soberania no jurizdisaun Estadu Timor-Leste nian,” Komandante Supremu Forsa Armada dehan liuhusi ninia deskursu iha seremónia aniversáriu Komponente Naval ba dala 17 ne’ebé hala’o iha Baze Naval Hera, Postu Administrativu Kristu Rei, Munisípiu Dili, sábadu (12/1).

Tuir Lú Olo katak dezafiu boot ida ne’e ezije Estadu atu fó prioridade loloos ba tasi ho governasaun di’ak.

“Estadu gasta osan barak ho forsa mariña maibé ita presiza duni halo investimentu ida ne’e. Se ita la tau matan didi’ak, fásil lakon forsa ne’e. Ita labele duplika meius. Tanba ne’e, importante hetan finansiamentu loloos hodi investe iha Komponente Navál, atu sosa ró ne’ebé bele hala’o misaun oi-oin no iha ne’ebé de’it. Ita presiza mós hetan finansiamentu ba serbisu manutensaun ró sira-nian hodi garante ró sira prontu atu hala’o serbisu iha momentu ne’ebé de’it,” Xefe Estadu tenik.

Nia informa, Timor-Leste labele fila kotuk ba tasi no ba ameasa hirak ne’ebé mai hosi tasi, hanesan pirataria, transporte ba sasán perigozu, poluisaun, esplorasaun ilegál ba rekursus, tráfiku oi-oin, terrorizmu, imigrasaun ilegál nsst.

“Ne’e duni, Estadu Timor-Leste tenke proteje tasi no kria kondisaun hirak ne’ebé presiza, atu tasi bele mós kontribui ba nasaun nia dezenvolvimentu sósiu-ekonómiku, liu-liu ba vida komunidade- sira-nian, ne’ebé hela besik tasi-ninin,” nia sujere.

Nia haktuir, hosi pontu devista jeográfiku, Timor-Leste nasaun ki’ik ida, maibé ida-ne’e laloos, tanba Timor-Leste nia plataforma kontinentál boot teb-tebes no Timor-Leste nia pozisaun jeoestratéjika sei nafatin rekursu boot no metin ida, la’ós de’it tanba ninia pozisaun rasik maibé mós tanba ninia rikusoin minerál sira, iha tasi-kidun, iha folin boot.

“Ne’e tanba Timor-Leste iha liña kosteira ida liu kilómetru atus hitu no Zona Ekonómika Eskluziva Marítima ida ho milla náutika atus rua, ita-nia área rekursu peska nian luan teb-tebes. Estudu ne’ebé hala’o iha Timor-Leste nia meti-ulun-ahu-ruin, identifika espésie ikan rihun ida resin no espésie ahu-ruin hamutuk atus haat no tanba ne’e, ita-nia tasi sai rekoñesidu mós ohin-loron hanesan sentru biodiversidade tasi-tropikál boot ida,” Lú Olo esklarese.

Iha biban ne’e, Prezidente Repúblika ho superior F-FDTL no konvidadu sira hala’o mós atividade kuda ai-oan sanulu ho signifikadu katak  ai-hun sira ne’e sei proteje ambiente iha área refere (Baze Naval Hera).

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here