Ministru Transporte no Komunikasaun, José Agustinho da Silva. Imajen Mídia MTK

DILI, (TATOLI) – Ministru Transporte no Komunikasaun, José Agustinho da Silva, hatete tempu badak sei desloka ba Indonézia, hasoru ministru tutela transporte aéreu hodi solusiona kestaun seguransa ba passajeiru no folin billete.

“Atu solusiona asuntu rua ne’e, aviaun ne’ebé hetan problema tékniku tutuir malu no folin billete mak sa’e, Ministériu Transporte no Komunikasaun iha ona planu, tempu badak sei desloka ba Indonézia para diskute kestaun transporte aéreu ho ministru tutela  Indonézia hodi bele hetan solusaun ne’ebé mak di’ak no dignu”, tenik iha sesaun plenária, debate urjente kona-ba kestaun transporte aéreu segunda ne’e.

Governante ne’e haktuir nia parte konvida ona reprezentante operadór nain tolu hanesan Sriwijaya, Nam Air no Citilink, liga ho akontesimentu foin lalais ne’e, maibé laiha solusaun.

“Duke ita gasta tempu, di’ak liu Governu ho Governu mak rezolve, hodi assuntu sira ne’e bele identifika no tau importansia hodi diskute ho sira”, katak.

Nia dehan durante ne’e operadór tolu nia ezisténsia ketak-ketak, signifika iha kompetisaun folin billete no laiha monopoli, maibé tanba mudansa jestaun hodi sira merje sai ida, entaun sira bele halimar ho folin.

Nia dehan Governu Timor-Leste iha diretu iha atu prevene no proteje sidadaun, liu-liu konsumedór operadór nian.

Nia mós rekonhese, operadór Sriwijaya ladun kumpre akordu ne’ebé mak asina ona entre parte rua, ne’ebé akordu ne’e rasik fó dalan ba Governu atu aumenta ka troka dezignasaun operadór ne’ebé nia asisténsia ladun satisfaz.

“Governu hato’o ba operadór Sriwijaya  atu halo tuir no kumpre akordu ne’ebé mak iha ona, liu-liu manutensaun rutina ba aviaun hirak ne’ebé mak halo operasaun mai iha Timor-Leste hodi garante seguransa ba pasajeiru, nomós mós folin ba billete ne’ebé mak la razoavel tuir rute Denpasar-Dili”, Tenik. 

Ministru ko’alia assuntu ne’e hodi hatan ba preokupasaun deputadu rekerente husi bankada PUDD, António de Sá Benevides, ne’ebe iha reuniaun lider bankada levanta kestaun ne’e tanba preokupasaun komunidade kona-ba aviaun sira ne’ebé mak sirkula iha rai laran, nune’e konvida ministru tutela hodi halo debate urjente iha plenária atu fahe informasaun.

“Komunidade preokupa tebes kona-ba aviaun, situasaun ne’ebé akontese ho aviaun Sriwijaya dala rua ona, ne’ebé konsege semo husi Dili-Denpasar ho kondisaun ne’ebé mak halo ita nia pasajeiru sira trauma tebes, ikus liu aviaun ne’e la konsege tun iha Dili maibé tun fali iha Makasar”, tenik iha plenária.

Nia hatutan: “Ida ne’e sai proukupasaun, ami atu husu ita boot sira nia informasaun, oinsá kontrolu kualidade ba aviaun, prinsipalmente ba Sriwijaya. Inklui mós folin billete, sé mak bele regula presu? tanba sá mak presu bele sa’e? Ha’u hanoin kestaun sira ne’e báziku maibé urjente”.

Xefe Bankada PD, António da Conceição, reforsa: “Ita tenke iha preokupasaun ba oinsá atu hala’o ita nia dezenvolvimentu iha rai laran, liu-liu hosi transporte áereu ne’ebé fasilita turizmu. Maibé bainhira sira haree situasaun ne’ebé foin dadauk dekorre resente ne’e, bele halo ema sira ne’ebé atu mai mós tauk”.

Hodi dehan tan: “Ita hakarak pasajeiru tenke iha seguransa ba ninia viajen, maibé mós imajen ne’ebé ita hakarak promove hodi dehan Timor sai destinu turíztiku mós liuhosi aviaun sira ne’ebé tama, ida ne’e mak halo ami preokupa”.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here