Funsionáriu futuru diplomátiku timoroan sira ne’eb’e simu sertifikadu, ohin, ih MNEK, hasai foto hamutuk ho Ministru Dionísio Babo Soares, Sekretáriu Jerál MNEK, Antonito de Araújo, Koordenadór Institutu Diplomátiku, Aurélio Guterres nomós seluk tan. Foto TATOLI: Rafy Belo

DÍLI, (TATOLI)-Funsionáriu no futuru diplomátiku timoroan sira ne’ebé hakna’ar aan iha Ministériu Negósiu Estranjeiru no Kooperasaun (MNEK) simu sertifikadu husi organizasaun LELI (Lorosa’e English Language Institute), hafoin tuir kursu língua ingleza, ho nível intermédiu, durante fulan tolu, iha ministériu ne’e. Na’in 21 ne’e kompostu husi partisipante ne’ebé pasa husi totál na’in 24. Katak na’in tolu la pasa.

Sekretáriu Jerál MNEK, Antonito de Araújo informa ba jornalista sira katak kursu ne’e hola parte polítika MNEK nian atu eleva kualidade funsionáriu diplomátiku sira nian, liliu iha aspetu língua estranjeira sira. Konkretamente língua ingleza.

“Língua ingleza ba Timor língua traballu, iha diplomásia ne’e, globalmente, iha mundu globalizadu, inglés ne’e instrumentu ida universál,” konsidera Antonito de Araújo perante mídia sira iha edifísiu MNEK, Praia dos Coqueiros, Díli, ohin lorokra’ik ne’e.

Nia esplika, MNEK nia papel atu hala’o polítika externa país nian ne’e uza inglés dalabarak tanba ida ne’e komesa tinan ida ne’e MNEK buka atu eleva kualidade funsionáriu diplomata sira ne’e iha língua ingleza nian. Maibé, programa foin komesa tinan ida ne’e.

“Ida ne’e primeiru grupu, sei iha segundu, terseiru i mais tan. Ohin, iha mós ideia para atu bele mós ministériu hanesan janela do país ne’e sei konvida mós ministériu seluk nia funsionáriu bele mai integra iha progarama sira ne’ebé mak sei investe tuir mai,” hateten Sekretáriu Jerál MNEK.

Nia mós informa katak formasaun língua ho nível intermédiu ne’e hala’o fulan tolu, karik iha nesesidade bele aumeta fulan neen to’o tinan. “Ida ne’e Institutu Estudu Diplomátiku, iha fatin ida ne’e mak sei fó formasaun ba funsionáriu sira ne’ebé mak atu reprezenta ita-nia rain iha li’ur hanesan diplomata”.

Kona-ba komprimísiu governu nian, sekretáriu ne’e akresenta katak governu komprometidu. “Ne’e hola parte komprimísiu governu atu apoiu ba ministériu atravéz institute ida ne’e,” subliña Sekretáriu Jerál MNEK, Antonito de Araújo.

Iha fatin hanesan, Koordenadór Institutu Diplomátiku, Aurélio Guterres, informa katak atribuisaun sertifikadu ba partisipante sira ne’e, hanesan preparasaun ba futuru diplomata timoroan sira antes destaka iha rai li’ur nomós antes sira tuir kursu espesífiku ba diplomásia no relasaun internasionál.

Koordenadór Institutu Diplomátiku, Aurélio Guterres

“Iha Institutu Estudu Diplomátiku, iha programa lubuk ida, ninia objetivu prinsipál mak atu prepara  ita-nia dipomata sira, timoroan sira, ne’ebé  antes ba rai li’ur sira bele apar ho asuntu ho kestaun nasionál nomós internasionál, ne’ebé que sira reprezenta ita-nia nasaun,” haktuir koordenadór ne’e.

Koordenadór ne’e mós haktuir katak iha formasaun ne’e rasik iha komponente importante haat hanesan komponente primeiru mak hasa’e diplomata sira-nia abilidade linguístika, iha portugés nomós inglés intermédiu, avansadu, diplomata sira mós sei tuir espesifikamente kursu diplomátiku ne’ebé programa sira ne’e pronto ona. Espera katak tinan ida ne’e bele hahú ona.

Foin dadauk futuru diplomata sira ne’e tuir kursu lian inglés ida espesífiku, hanesan faze ida atu bele hakat ba kursu formasaun diplomátiku.

Em termos desizaun, husi ministériu relevante, Ministériu Negósiu Estranjeiru rasik, sei deside. Ne’eb’e, ita espara katak iha futuru oin, envolve mós mininstériu relevante sira hanesan Ministériu Defeza, Seguransa ou ministériu sira ne’ebé hala’o serbisu iha rai li’ur inklui mós ministériu hanesan turizmu, Komérsiu Indústria, Edukasaun. Ema sira ne’e antes destaka iha rai li’ur sira mai tuir mós kursu formasaun iha ne’e para alende língua nomós kursu diplomátiku,” nia esplika.

Kona-ba mekanizmu, tuir Koordenadór Institutu Diplomátiku, Aurélio Guterres katak primeiru, Ministériu sira, haruka mai sira-nia funsionáriu sira ne’ebé, sira prepara atu destaka ba rai li’ur. Segundu ema tenke iha abilidade linguístika, mínimu intermédiu.

“Sira mai, depois iha ne’e, ita iha sistema rasik, iha Institutu Estudu Diplomátiku, iha nia sistema no mekanizmu rasik atu teste, haree ema sira ne’e ninia abilidade linguístika, iha área língua portugeza,” informa Koordenadór Aurélio Guterres.

Iha sikun seluk, Partisipante ida, Faustinho de Sousa Freitas, hafoin simu sertifikadu ba jornalista sira katak kontente tebes tanba maske iha serbisu nia laran maibé jere tempu hodi bele hodi aproveita kursu ida ne’e ho didi’ak to’ot hotu; ramata. “Ohin, ami simu sertifikadu,” demonstra Faustinho de Sousa Freitas, husi diresaun umanu, MNEK.

Partisipa iha atribuisaun sertifikadu ba partisipantu kursu lian inglés , nível intermédiu ne’e mak Ministru Negósiu Estranjeiru no Kooperasaun (MNEK), Dionísio Babo Soares no interveniente seluk tan iha MNEK.

Institutu Estudu Diplomátiku MNEK alende fasilita formasaun linguístika hanesan inglés, iha mós formasaun ba kursu lian portugés, diplomásia no seluk tan.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here