Primeiru-Ministru, Taur Matan Ruak, iha debate jeneralidade loron daruak iha uma fukun Parlamentu Nasionál. Foto António Goncalves

DILI (TATOLI)—Prezidente Parlamentu Nasionál (PPN), Aráo Noé afirma, sei la iha negosiasaun entre bankada Parlamentu Nasionál (PN) sira tanba ida ne’e mak ajenda ba eleisaun komisáriu Komisaun Anti Korrupsaun (KAK), suspende fulan ida resin ona, no ohin (Segunda) mós Adia tan ba eleisaun.

Sira na’in rua ne’e (Aderito Tilman no Sergio Hornay) mak la eleitu ita devolve fali atu governu aprezenta kandidatu foun. Mas kuandu ita seidauk halo asaun ruma, la iha dala atu ita devolve. Ita suspende fulan ida resin maibé dalan atu negósia malu mak la iha nafatin, entaun ita halo asaun ho legál liuhosi plenária hodi deside kona-ba kandidatu rua,” PPN, Aráo Noé fó sai iha plenária PN, Ohin.

Nia hatutan, tuir lei governu mak aprezenta kandidatu. “Parlamentu hala’o nia funsaun hodi vota ida ne’ebé mak sai eleitu. Atu hasai ka halakon kandidatu ida ne’e la’ós kompeténsia parlamentu nian.”

Entretantu Parlamentu ohin la konsege realiza eleisaun ba komisáriu KAK foun ho kandidatu sira hanesan, Aderito Tilman (komisáriu KAK maibé mandatu ramata ona), no Sergio Hornay (Eis-Prezidente Defensoria Públika). PPN sei haruka karta ba governu atu atualiza informasaun kona-ba pozisaun kandidatu Aderito Tilman hafoin bele ajenda fila fali hodi ba eleisaun.

Xefe Bankada Frente Revolusionáriu Timor-Leste Independente (Fretilín), Aniceto Guterres, afirma kandidatu Komisáriu Komisaun Anti Korrupsaun (KAK) atu ajenda hodi realiza eleisaun, presiza iha konsensu.

“Tenke iha konsensu hafoin ba eleisaun kandidatura Komisáriu Komisaun Anti Korrupsaun. Ida ne’e mak lei ezije, konsensu tenke mai hosi Bankada CNRT ho Fretilín,” Aniceto Guterres hato’o iha nia intervensaun, ohin.

Tuir nia katak kestaun komisáriu ne’e buat ki’ik ida, maibé tuur hamutuk hodi halo konsensu ne’e importante. Tanba la’ós atu ba trata komisáriu de’it maibé atu haree mós polítika no sistema kombate korrupsaun.

Nia sujere presiza aserta polítika (Fretilín & CNRT) oinsá atu kombate korrupsaun, liuhosi prosesu tur hamutuk. “Sé la presiza konsensu, ita avansa ba eleisaun komisáriu KAK.”

Deputadu Fretilín, Joaquim dos Santos, reforsa kandidatu Aderito Tilman haruka ona karta mai parlamentu tanba mandatu hotu ona. Atu kandidatu hikas fali, nia sujere atu Parlamentu Nasionál konfirma hikas ba nia (Aderito Tilman), halo atualizasaun ba informasaun atu Parlamentu bele hatene serteza kandidatura.

Sé rezigna-an entaun avansa ho kandidatu ida de’it. Maibé, molok ita hatama iha lista. Prosesu eleisaun tenke iha konfirmasaun ba substánsia karta ne’e.

Parte seluk, Xefe Bankada CNRT, Duarte Nunes, dehan presiza iha konsensu. Maibé iha momentu atu enkontru iha lider bankada akontese duni maibé tuir fali mai, entre reuniaun ho xefe bankada rua ne’e la akontese to’o agora, maibé di’ak liu avansa ba eleisaun.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here