Ministru Reforma Lejislativa no Assuntu Parlamentar, Fidelis Leite Magalhães. Imajen: Antonio Goncalves

DILI (TATOLI) – Oitavu Governu Konstitusionál liuhosi desizaun Konsellu Ministru (KM), aprova ona Proposta Rezolusaun Governu ne’ebé aprezenta husi Primeiru-Ministru (PM), Taur Matan Ruak, hodi kria Konsellu Interministerial ba Protesaun Sivíl no Jestaun Dezastre Natural.

“Konsellu Ministru aprova ona estabelesimentu Konsellu interministerial ida ne’ebé mak lidera husi Primeiru-Ministru, liu-liu hare ba protesaun sivíl no dezastre natural sira”, tenik Ministru Reforma Lejizlativa no Asuntu Parlamentár, Fidelis Leite Magalhães, hafoin reuniaun ezekutivu remata iha Palásiu Governu, ohin.

Governante ne’e hatutan, foin lais ne’e iha dezastre natural balun, liu-liu iha parte Leste, ne’ebé Governu tenke iha mekanizmu di’ak liu atu responde ho lalais bainhira dezastre sira ne’e mosu atu bele atua no garante integridade bens no umana sidadaun sira.

Hodi informa tan, Konsellu interministerial ne’e involve ministériu sira ne’ebé mak iha relasaun ho protesaun sivíl, interior, Finansa, obras públika, solidariedade sosiál no inkluzaun, servisu nasionál intelijénsia, diresaun ba jestaun krize, Gabinete PM no seluk tan hanesan entidade sira ne’ebé mak sei tur hamutuk iha konselhu ne’e.

Enkuantu entidade sira ne’ebé mak la’ós membru governu, sei fó apoiu iha parte Task Force, ba konsellu interministerial ba ministru sira ne’ebé mak tau matan ba asuntu ne’ebé mak relasiona protesaun sivíl, dezastre natural no seguransa.

Entidade hirak ne’e sei reprezenta husi sira nia ministru, atu konsellu ne’e hafoin hetan informasaun bele halo kedan enkontru deliberasaun para responde emerjénsia ba situasaun ne’ebé mak mosu, hodi bele informa ba KM.

Entretantu, Konsellu Interministerial ba Protesaun Sivíl no Jestaun Dezastre Natural hanesan koordenasaun nasionál husi órgaun no servisu administrasaun públiku para prevensaun risku koletivu inerente sira ba situasaun asidente grave ou katástrofe.

Konsellu ne’e, sei responsavel husi dezenvolvimentu diploma legal no regulamentu administrativus nesesáriu sira ba ba ninia ezekusaun.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here