Sekretáriu Estadu Komunikasaun Sosial, Merício Juvenal “Akara” hala'o enkontru ho lider komunitariu sira. imajen: Egas Cristovão

OEKUSI (TATOLI) – Sekretáriu Estadu Komunikasaun Sosiál, Merício Juvenal “Akara”, iha nia vizita foin lalais ne’e ba enklave Oekusi, promete katak; sei aumenta frekuénsia ba radio komunidade Atoni tanba frekuénsia ne’ebé oras ne’e iha komunidade sira iha suku rua labele asesu.

“Ha’u identifika ita nia komunidade suku rua mak seidauk asesu Rádiu Komunidade Atoni Lifau, no ha’u hatete ba oin sei aumenta nia frekuénsia. Ha’u mós dehan konaba RTTL no Ajénsia Tatoli, liu-liu RTTL ita sei hadi’a, hodi hasa’e persentajen ba asesu, tanba ita tenke hadi’a sistema,  torre frekuénsia para tinan lima nia laran asesu ba RTTL aumenta tan”, dehan Akara durante vizita fim de semana ne’e.

Governante ne’e dehan tan,  nia parte sei tranzmite informasaun ne’e ba Primeiru-Ministru, nune’e Xefe Governu bele informadu konaba kondisaun real iha baze, no promote sei fasilita informasaun hodi lori too iha baze hodi komunidade sira bele akompaña informasaun.

Parte seluk, Xefi Suku Bene-ufe, Marcos Meni aprezenta, too oras nee sira la asesu RTTL no, Rádiu Komunidade Atoni Lifau, maibé asesu fali rádiu husi Indonesia tanba besik fronteira.

“Iha ami nia suku la iha asesu ba Rádiu Komunidade no RTTL, maibé komunidade balun sira asesu ba frekuénsia rádiu Indonesia de’it, hanesan Kupang,  Maumere,  ita nia rádiu rasik ami la asesu  totalmente, ” tenik Marcos.

Entretantu, durante vizita lider komunitária sira mós husu atu asesu informasaun liu husi media imprime tanba antes nee komunidade konsege asesu, maibé oras nee paradu.

Jornalista: Egas Cristovão

Editór : Manuel Pinto

HAKEREK NO HATÁN

Please enter your comment!
Please enter your name here