Enkontru entre Majór Jenerál Lere Anan Timur no Xefe Estadu Lú Olo.

DILI (TATOLI)—Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, fó agradese no louva populasaun tanba bele manán konsiénsia hodi kria estabilidade.

“Uluk ha’u konta katak Natal no Tinan Foun ne’e situasaun bele át maibé afinál kontráriu. Situasaun sai di’ak. Ha’u fó parabens ba ita-nia povu, liu-liu sira nia maturidade no sira nia responsabilidade nu’udar timoroan,” eis líder rezisténsia ba jornalista sira iha Palásiu Prezidente Nicolau Lobato, Bairru Pité, sesta ne’e, hafoin levanta situasaun siguransa rai laran hahú hosi selebrasaun Natal no Tinan Foun to’o mai ohin loron ba Prezidente Repúblika, Francisco Guterres Lú Olo.

Nia haktuir, kuaze problema ne’ebé akontese iha rai laran ne’e maioria mosu hosi artes marsiais, tan ne’e, apela ba joven sira ne’ebé involve iha artes marsiais atu hadomi futuru.

“Artes marsiais ne’e ha’u hateten beibeik katak la’ós katuas fúk mutin sira maka halo parte iha artes marsiais maibé foinsa’e sira. Ne’e maka primeiru joven sira ne’e tenke hadomi imi nia futuru. Kuandu imi komete krime ona ne’e imi nia futuru lakon ona,” Lere tenik.

Nia sujere ba Governu atu buka fórmas hotu-hotu halo oinsá para bele transforma artes marsiais hanesan desportu ba Timor.

“Hanesan uluk ha’u dehan ona katak artes marsiais ne’ebé oras ne’e iha Timor ninia hún la’ós iha Timor. Ninia hún iha Indonézia. Entaun, kuandu jura ne’e sira ba jura fali iha Indonézia. Sira simu órden mós iha Indonézia ne’ebá. Tan ne’e, ha’u hanoin katak tenke sai Timor ninian atu bele kompete iha mundu internasionál,” Majór Jenerál ne’e haklaken.

Nia haktuir katak dezde Polísia Nasionál Timor-Leste (PNTL) no F-FDTL harii, instituisaun rua ne’e kontinua serbisu hamutuk atu kombate ka prevene krime hotu-hotu ne’ebé maka mosu iha rai laran.

“Ha’u rona informasaun balun  dehan katak se Prezidente Repúblika veta orsamentu jerál Estadu (OJE) 2019, Timor sei rahun. Ema ne’ebé ko’alia ida ne’e bosokten, kobarde no taukten. Ha’u hatene ninia naran, tan ne’e tenke kuidadu. Kuandu ita ameasa estabilidade nasionál, ne’e krimi. Ohin bele kaptura no aban bele kaptura. Labele mai dehan Timor rahun ne’e buat fásil ida. Ita atu halo fera manu tolun mós sei halo esforsu, satán harahun nasaun. Timor ne’e la’ós kualkér ema maka atu halo rahun. Só Maromak de’it maka bele kastigu to’o naben, maibé ita ema ne’e lalika ameasa malu,” nia realsa.

Nia dehan ba Prezidente Repúblika katak lalika moris iha presaun nia laran, lalika moris ho presaun no lalika tauk presaun.

“Ami ne’ebé uluk terus no barak ne’ebé mate ona ne’e hakarak Timor hakmatek. Ita uluk lakohi halo funu maibé Indonézia maka obriga ita halo funu. Ita halo funu tanba atu halakon funu. Ida ne’e maka importante,” Lere esklarese.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here