Prezidente Repúblika Francisco Guterres Lú Olo, Kinta (9/5/2019), alerta ba Governu liuhosi Primeiru-Ministru, Taur Matan Ruak, atu fó asistensia no tratamentu saúde ba veteranu sira. Imajen/António Goncalves

DILI (TATOLI)—Primeiru-Ministru (PM), Taur Matan Ruak, hateten nia lakohi espékula Prezidente Repúblika (PR) nia desizaun ligadu ho promulga ka la promulga orsamentu jerál Estadu (OJE) 2019.

“Ha’u nia hanoin ita hein desizaun Prezidente Repúblika tanba opiniaun ne’e hotu-hotu bele iha maibé última desizaun ne’e Prezidente Repúblika maka desidi,” PM Taur Matan Ruak ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin hala’o enkontru ho Xefe Estadu, Francisco Guterres Lú Olo kona-ba Governu nia serbisu.

Xefe Governu dehan, nia sei fó ninia opiniaun bainhira Xefe Estadu desidi ona OJE tuir nia kompeténsia, tanba oras ne’e Prezidente Repúblika sei estuda hela OJE to’o prazu determinadu.

Relasiona ho preokupasaun kona-ba orsamentu ba setór agrikultura, edukasaun no saúde ki’ik, nia hatán,  orsamentu 2019 nian ne’e tau orsamentu boot liu (miliaun $650) ba indústria petrolífera tanba atu ajuda asegura kontinuasaun extensaun fundu petrolíferu.

“Karik ita la investe ida ne’e, ha’u la fiar katak setór agrikultura sei lori osan mai atu finansia atividade Estadu nian iha tinan hira tuir mai. Fundu ida ne’e sedu ka tarde nia tenke hotu. Agora, ha’u nia pergunta, kuandu hotu ne’e osan mai hosi ne’ebé? Tenke mai hosi indústria petrolífera. Indútria kafé mós sei la fó osan ba ita satán kafé tama iha terseiru lugár. Tanba ne’e, ita tenke investe uluk iha área ne’ebé prioridade liu,” Eis PR ne’e esplika.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here