iklan

NASIONÁL

MNEK-SEFOPE Hasoru Malu Ko’alia Oportunidade Ne’ebé Japaun Oferese

MNEK-SEFOPE Hasoru Malu Ko’alia Oportunidade Ne’ebé Japaun Oferese

Ministru Negósiu Estranjeiru no Kooperasaun (MNEK), Dionísio Babo Soares, no Sekretáriu Estadu Formasaun Profisionál no Empregu (SEFOPE), Julião da Silva. Foto/MNEK.

DILI, (TATOLI) – Ministru Negósiu Estranjeiru no Kooperasaun (MNEK), Dionísio Babo Soares, ho Sekretáriu Estadu Formasaun Profisionál no Empregu (SEFOPE), Julião da Silva, hasoru malu hodi ko’alia sobre oportunidade serbisu ne’ebé Governu Japaun oferese mai Timor-Leste.

“Ami ko’alia sobre oportunidade ne’ebé Governu Japaun fó, oinsá maka bele hatama timoroan iha ne’ebá. Tanba ne’e maka hanoin hela se bele ami halo vizita hamutuk bá Japaun hodi ko’alia di’ak liután. Komunikasaun komesa ona, mas tenke haree detallu ne’e saida tanba foin maka loke”, eis Ministru Justisa informa ohin iha nia knaar fatin Praia dos Coqueiros, hafoin soru-mutu ho SEFOPE.

Husu sobre númeru timoroan ne’ebé atu bá, ministru Dionísio dehan seidauk tanba foin maka atu bá ko’alia.

SEFOPE, Julião da Silva, hatutan iha tinan kotuk MNEK halo vizita bá li’ur no tenta halo negosiasaun ho nasaun balun hanesan Japaun ne’ebé hakarak fó oportunidade ba Timor-Leste atubele haruka timoroan sira hodi hetan oportunidade serbisu mós iha Japaun.

“Ne’ebé iha tinan ne’e ministru sei kontinua dezloka bá Japaun depois ko’alia ho Governu Japaun oinsá bele diskute tékniku liu”, katak.

Iha enkontru entre governante na’in-rua ne’e ko’alia mós kona-ba preparasaun asina akordu ba programa serbisu sazonál entre governu Timor-Leste ho Austrália nomós diskute koordenasaun serbisu relasiona ho traballadór timoroan ne’ebé serbisu iha Austrália no Korea.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!