Anin sobu uma lima iha aldeia 12 de Outubru, suku Komoro, postu administrativu  Dom Aleixo, Munisípiu Dili. Dokumentasaun Tatoli/Agapito dos Santos

DILI, (TATOLI) – Sekretáriu Estadu Protesaun Sivíl, Alexandrinho de Araújo, hasoru Primeiru-Ministru (PM), Taur Matan Ruak, iha Palásiu Governu hodi ko’alia kona-ba apoiu ba populasaun afetadu dezastre naturál.

“Ohin ha’u ko’alia ho Primeiru-Ministru kona-ba dezastre naturál ne’ebé mak afeta ba ita nia populasaun sira iha munisípiu hotu. Agora oinsá mak atu prepara mekanizmu apoiu ba populasaun ne’ebé mak afetadu ba dezastre naturál”, tenik Alexandrinho ba jornalista sira hafoin hasoru malu, ohin.

Governante ne’e hatutan mekanizmu mak presiza dadus ne’ebé mak tenke mai husi munisípiu rasik, hafoin hamutuk ho pontu fokál sira ne’ebé mak estabelese ona iha 2016, nune’e dadus sira bele kredível no mai husi odomatan ida de’it.

“Apoiu seluk haree liu ba dezastre ne’ebé intervensaun dahuluk presiza iha, hafoin haree dadus para bele halo kontrusaun uma ne’ebé aat. Dadus ne’ebé iha sei provizóriu, iha 500 uma resin, maibé dadus sira sei verifika fali”, informa.

Nia dehan parte ministériu husu atu bele aselera dadus sira, tanba populasaun hein hela.

Kestaun ne’e, nia relata enkontru ohin ho PM fó ordem segunda oin bele enkontru ho protesaun sivíl, estatál, sosiál no instituisaun relevante atu bele kria komité ida atu bele servisu hamutuk halo verifikasaun ba dadus, nune’e bele tulun povu ne’ebé mak afetadu.

Hodi dehan tan agora dadauk iha apoiu umanitáriu, hanesan ai-han, alende ne’e mós mobiliza ajénsia internasionál sira, atu halo konstrusaun ba uma aat, tanba ne’e presiza prepara lona ba populasaun sira.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here