Prezidente RTTL.EP, Francisco da Silva Gari, ne'ebé nomeadu hosi enkontru Konsellu Ministru, ohin. Imajen hosi FB Racom Maubisse Mauloko

DILI, (TATOLI) – Governu liuhosi enkontru Konsellu Ministru, ohin aprova proposta ezonerasaun Prezidente Konsellu Administrasaun Radiu Televizaun Timor-Leste (RTTL) Emprensa Públika (EP), Gil da Costa koñesidu ho Naldo Rei, hodi nomea eis Diretór Radiu Liberdade, Francisco da Silva Gari, hodi lidera RTTL.EP.

“Francisco Gari maka sei sai prezidente RTTL,EP foun tuir lei ba períodu tinan haat”, hatete Sekretáriu Estadu Komunikasaun Sosiál (SEKOMS), Merício Juvenal dos Reis Akara, ba jornalista sira iha Palásiu Governu, ohin.

Ezonerasaun ne’e akontese bazea ba rezultadu auditoria interna SEKOMS no Inspesaun Jerál Estadu inklui preokupasaun públiku ne’ebé identifika irregularidade balun mosu iha jestaun no administrasaun, kualidade informasaun, rekursu umanu no seluk tan.

“Bazea ba diagnostika no relatóriu hirak ne’e, to’o ona tempu halo mudansa hodi hadi’a RTTL ba oin ho prezidente foun”, akresenta tan. Prezidente nomeadu sei simu pose hafoin públika iha jornál repúblika.

Jornalista Tatoli, Agapito dos Santos, halo entrevista ho Prezidente sesante RTTL.EP, Naldo Rei, iha ninia servisu fatin Kaikoli. Imajen Egas Cristovão

Sikun seluk, Prezidente sesante RTTL,EP, Naldo Rei, hatete simu desizaun ne’e. “Ha’u submete ba desizaun polítika, ne’ebe laiha problema”, afirma nia ba Tatoli iha edifísiu RTTL,EP Kaikoli.

Nia husu atu dezenvolve instituisaun públika ne’e ba oin. Akresenta mós polítika sira labele kontinua halo intervensaun.

Hatan ba irregularidade, Gil da Costa, hakarak responsabiliza ba irregularidade ne’ebé mosu durante ninia mandatu bainhira SEKOMS fó sai rezultadu auditoria interna.

Entretantu auditoria interna akontese bazea ba dekretu lei númeru 1 artigu haat no artigu 4, dekretu númeru 42/2008, 26 novembru fó dalan SEKOMS halo auditoria ba RTTL,EP iha fulan-outobru 2018.

Nia hateten hakarak koopera ho justisa bainhira governu públika ona rezultadu auditoria refere antes termina ninia mandatu iha tempu besik.

“Ha’u prontu atu ba hatan, tanba servisu instituisaun Estadu nian maibé tenke iha evidensia”, dehan ba TATOLI, ohin (10/1).

Mesmu hetan ona auditoria maibé nia rasik to’o ohin loron seidauk simu rezultadu ne’e hodi indika ba prátika irregularidade iha instituisaun ne’e.

Durante fulan hirak nia laran tenke uza reseita RTTL,EP ne’ebé hetan koñesementu hosi SEKOMS hodi selu saláriu funsionariu empreza hamutuk 198, tanba la hetan tranferénsia hosi governu durante fulan agostu 2018 to’o ohin.

Reseita iha kofre RTTL,EP oras ne’e hamutuk milliaun dolar ida resin ne’e hosi 2016 to’o 2018.

Ikus liu, nia mos rekoñese simu karta hosi Inspesaun Jerál Estadu hodi klarifika desizaun hodi fasilita output ba Radiu Televisaun Maubere (RTM) durante transmisaun direta ba debate Orsamentu Jerál Estadu 2018, ne’e la’o tuir desizaun balun ne’ebé eis prezidente RTTL.EP tuan halo ona ho RTM.

Durante ninia responsabilidade, aumenta programa foun hanesan kafé dader nomós mudansa ba aprejentadór notísia no seluk tan.

Naldo Rei simu pose hosi eis-Primeiru Ministru, Mari Alkatiri, iha loron 1 fulan-fevereiru 2018, iha Palásiu Governu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here