Fatin lixu iha entrada ba Kristu Rei. Imajen espesiál

DILI, (TATOLI) – Diretór Departamentu Komérsiu no Turizmu Fakuldade Ekonomia no Jestaun Universidade Nasionál Timor Lorosa’e (UNTL), Aloysius Louis Hernriques, hatete jestaun ne’ebé di’ak atu kria ambiente ne’ebé moos maka asaun ne’ebé presiza halo maka’as ba dahuluk mai husi ita an rasik, sidadaun hotu-hotu husi ki’ik ka boot.

“Kuandu ambiente fo’er bele dada moras oioin ba ita, entaun ita hotu tenke rai ita-nia koxiénsia katak ita hakarak moris saudavel, moris di’ak, ambiente moos haree furak,  ita tenke iha konxiénsia atubele hamoos fo’er sira ne’ebé maka iha no halo jestaun katak halo husi individuál maka ba komún depois ida-idak hatene  nia responsabilidade”, Aloysius afirma iha kampus rezende ohin.

Hatutan abitante liuliu líder suku ka aldeia halo planu ne’ebé maka di’ak atu hasoru problema lixu hanesan halo limpeza jerál semana ida dalaida ka rua nune’e bele kontribui.

“Labele Governu maka tenke atende buat ki’ik ka boot, mas buat ne’ebé maka ki’ik ita bele hahú rezolve, ezemplu iha uma, udan mai lori fo’er bá taka drainazen hotu-hotu iha hanoin bele kontribui tanba ambiente”.

Nia dehan asaun abitante mai husi sira rasik nomós líder ne’ebé fó fiar atubele tau planu hanesan atividade rutina ruma hanesan hamoos ne’e hanesan parte ida husi jestaun ba lixu nia para ema hotu bele hasees an husi moras ne’ebé mai.

“Ita tenke halo asaun ne’ebé maka’as dahuluk mai husi ita rasik, mai husi sidadaun hotu-hotu, ki’ik ka boot. Hanesan sira Ki’ik iha uma fó hatene labale so’e fo’er arbiru, iha eskola mós sira tenke treinu hanesan tau fo’er, iha responsabilidade atu hamoos. Hahú husi buat sira ki’ik ne’e depois sira mai iha sosiedade, hahú husi ki’ik ne’e ita tenke tau prioridade”.

Relasiona ho vizita turistra sira ne’ebé mai ho lixu ne’ebé iha sai problema boot tanba atu dada ema mai importante mak fatin moos.

“Bee mós moos depois fo’er mós iha fatin, ita mós tenke kuidadu ba ai-han sira atu moos nafatin, estrada sira bele iha kondisaun no sira ne’e maka bele fó klima ne’ebé di’ak, saudavel atu ema mai, tanba ema mai maka kondisaun sira fo’er ne’e ema ta’uk tanba ema dehan ita la’ós atu bá kontente, mas moras fali tanba buat hanesan ne’e bele lafó dalan. Ita hakarak halo promosaun tenke promove buat ne’ebé maka iha kondisaun di’ak duni”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here