Ró Seabourn tula pasajeiru 450, ohin to’o iha Portu Dili. Imajen António Goncalves

DILI, (TATOLI) – Timor-Leste liuliu Dili, ohin, simu turista hamutuk 450 ho ró kruzeiuru ho naran Seabourn.

Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, informa ró ne’e to’o iha kapitál iha tuku hitu dadeer no pasajeiru sira foin bele tun iha tuku ualu ho balun hafoin halo sira-nia vizita bá fatin sira ne’ebé atu bá.

“Ró ne’e ho kapasidade ema 450, maibé ró ne’e diferente uitoan tanba ba ema rikasu sira, ró ne’e luxu nian ne’ebé maioria ema sira ne’e ho ida reforma ona, sira hakarak pasiar hale’u mundu. Pasajeiru sira ne’e bazea ba informasaun ne’ebé Ministériu Turizmu hetan katak barak maka sei dezloka ba munisípiu Ermera bá vizita Kafé nomós sei bá Dare no fatin besik sira hanesan Kristu Rei no Muzeu Rezisténsia”, Quintas infoma iha Portu Dili ohin.

Ho vizita ró kruzeiru ne’e tuir prespetiva MTKI ne’e sinál di’ak tebes tanba foin iha janeiru, maibé ró komesa mai fali ona.

“Ne’e hatudu katak imajen Timor-Leste jeralmente di’ak, situasaun hakmatek mezmu polítikamente na’i-ulun sira sei iha diferensa ideia, maibé importante maka povu sira mós hakmatek, ita hatudu buat sira kapa’as iha internasionál katak Timor-Leste nasaun ida ne’ebé seguru, destinasaun turístika ida hakmatek ne’e maka ró komesa mai no iha loron 16 janeiru ró sei mai tan, siginifika hatudu sinál ida di’ak”.

Pasajeiru sira iha ró Seabourn ne’e husi nasaun oioin hanesan Austrália, Kanadá, Amérika nomós Europa balun tanba antes ró sira mai maioria ne’e husi Austrália, maibé daudaun ne’e komesa kahur, nune’e hatudu katak ema barak hahú interese vizita país ne’e.

“Tanba ita hotu hatene Timor-Leste nu’udar destinu turístiku emerjente, destinu turístiku ida joven liu iha Ázia no Pasífiku entaun ema hakarak buka hatene, hakarak mai tanba ema dalabarak bá ona Singapura, Tailándia no nasaun sira seluk, maibé Timór ne’e hanesan buat ida úniku uitoan ho nia naran entaun ema hakarak mai”.

Vizitante sira ne’e mai paseu iha Timor-Leste durante oras ualu hafoin kontinua sira-nia destinu ba país viziñu iha illa Komodo, Indonézia hafoin kontinua sira-nia viajen bá rai seluk.

Kona-ba atendimentu ba turista sira ne’ebé mai ne’e MTKI serbisu hamutuk ho setór privadu sira hodi atende bainaka sira ne’e nomós organiza malu halo bazár iha Lisidere para vizitate sira bá karik bele hola buat ruma.

Jornalista: Maria Auxiliadora

Editora: Rita Almeida

1 KOMENTÁRIU

HAKEREK NO HATÁN

Please enter your comment!
Please enter your name here