Primeiru-Ministru, Taur Matan Ruak, iha debate jeneralidade loron daruak iha uma fukun Parlamentu Nasionál. Foto António Goncalves

DILI (TATOLI)—Jurista timoroan, Manuel Tilman hateten Alterasaun Lei Atividade Petrolífera ne’ebé antes ne’e Xefe Estadu veta tiha ona, maibé se Parlamentu Nasionál (PN) la haruka sira nia pozisaun ba Prezidente Repúblika (PR), entaun sei labele hasai fundu mina rai atu tau fali mai iha orsamentu jerál Estadu (OJE) 2019.

Jurista Manuel Tilman

“Lei Atividade Petrolífera, Lei Fundu Mina rai no Lei Orsamentu Jerál Estadu iha ligasaun ba malu bainhira ba hasai osan hosi fundu mina rai nian. Maibé, Lei Atividade Petrolífera, Xefe Estadu veta tiha ona, entaun ninia implikasaun ba OJE. Ida ne’e maka ohin ami hateten ba Prezidente,” Tilman ba jornalista sira iha Palásiu Prezidente Nicolau Lobato, Bairru Pité, tersa ne’e, bainhira hamutuk ho ninia maluk jurista sira seluk hala’o enkontru ho Prezidente Repúblika, Francisco Guterres Lú Olo, hodi fó sira nia opiniaun ba OJE 2019.

Nia dehan orsamentu jerál Estadu 2019 ne’e nu’udar orsamentu ne’ebé boot, maibé alokasaun orsamentu ba Indústria Estrativas (mina rai) ne’e boot tebes (kuaze 24%) kompara ho indústria transformadóra (agrikultura no edukasaun) ne’ebé ho porsentu 1 (1%) de’it.

“Maski populasaun iha Timor ho porsentu 80 (80%) nu’udar agrikultór maibé orsamentu ba área agrikultura ho porsentu ki’ik liu (1%),” konstitusionalista ne’e haktuir.

Tilman informa katak opiniaun ne’ebé sira hato’o ne’e la vinkula Prezidente Repúblika nia desizaun, tanba Prezidente Repúblika iha direitu prerogativu atu deside.

Jurista sira ne’ebé partisipa iha enkontru ho Prezidente Repúblika maka Manuel Tilman, Avelino Coelho, Sérgio Hornay, Tomé Xavier no sira seluk tan.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here