Ministru Agrikultura no Peska, Joaquim José Gusmão dos Reis Martins. Foto/MAP.

DILI, (TATOLI) – Ministériu Agrikultura no Peska (MAP) halo reuniaun alargada ho nia funsionáriu ministériu tomak atubele fó hanoin filafali saida maka hala’o iha 2018 no to’o iha ne’ebé ona nomós fó korajen ba serbisu na’in sira hotu nune’e iha tinan ne’e bele halo knaar ho di’ak liután.

Ministru Agrikultura no Peska, Joaquim José Gusmão dos Reis Martins, hatete MAP halo ona buat balun no barak maka seidauk, tanba iha 2018 la’o ho orsamentu duodésimu ne’ebé limitadu tebes atu hala’o programa, maibé MAP kontinua esforsu nafatin programa sira ne’ebé maka iha nomós orsamentu jerál tinan kotuk ho tempu ne’ebé badak tebes.

“MAP iha tiha ona programa estratéjiku ne’ebé atu implementa, ne’ebé programa hotu ho osan ne’ebé iha ita aliña ho programa”, Joaquim afirma iha salaun Katedrál Vila-Verde, ohin.

Hatutan iha 2019 prioridade MAP nia maka hasa’e produsaun hare, batar, hahán loroloron povu nian depois haree ba área sira seluk ne’ebé bele hatama rendimetu ba kofre Estadu hanesan peska, pekuária no floresta, nune’e osan ne’ebé iha aloka ba programa sira ne’e.

Aleinde iha tinan ne’e mós fó importánsia atu identifika hotu irrigasaun sira ne’ebé iha para 2020 tau osan atu hadi’a tanba polítika MAP nian ne’e lahalo tan kontrusaun foun ba irrigasaun, maibé masimiza irrigasaun neebé iha tanba iha irrigasaun barak, maibé natar ne’ebé halai ladún.

“Ita halo foun mak lahalo manutesaun hanesan de’it, di’ak liu haree sira ne’ebé ezistente, ita identifika, tau osan atu hadi’a tanba iha mudansa klimátika ne’e halo irrigasaun sira ne’e aat”.

Nia hatutan tan: “Iha irrigasaun balun agora afeta ona ba mudansa klimátika. Agora daudaun ita identifika iha Bulutu ne’e maka grave uitoan, ne’ebé agora ita haree atu mobiliza ita-nia mákina balun bá Bulutu para bele normaliza kanál irrigasaun ne’ebá. Maliana I mós nia odamatan ne’e sei iha problema uitoan tanba ne’e maka prioridade tinan ne’e atu identifika hotu irrigasaun sira ne’ebé maka iha para bele hadi’a atu masimiza no haluan tan ita-nia área kultivasaun”.

Sekretáriu Jerál MAP, César José da Cruz, hatete enkontru jerál MAP nian ne’e haree ba serbisu 2018 no preparativu ba tinan ne’e nian no iha relatóriu ne’ebé aprezenta MAP nia orsamentu iha 2019 ladún boot milliaun $14 resin de’it no ida ne’e maka sai dezafiu ba ministériu oinsá maka bele hala’o nian serbisu iha territóriu tomak.

“Mas ida ne’e maka ita-nia Orsamentu Jerál Estadu, ita hein katak ho orsamentu ne’ebé iha bele alkansa tuir objetivu loloos ministériu nia serbisu iha sub-setór haat, agrikultura, floresta, peska nomós pekuária no veterinária”.

Tanba ne’e iha 2019 MAP serbisu maka’as oinsá maka hasa’e produsaun, haree ba kualidade produsaun ne’ebé nutritivu no sai preokupasaun ministériu nian atubele alkansa nia objetivu prinsipál liuliu ai-han iha rai-laran.

“Hanoin ho milliaun 14 ne’e ami bele prodús buat balun, maibé buat barak liu kontinuasaun husi programa ne’ebé hala’o tiha ona iha tinan hira liubá. Ministériu Agrikultura no Peska sempre iha esperansa no agora hadi’a no hadi’a nafatin liuliu ema hotu tenke iha konxiénsia katak agrikultura ne’e buat ida importante”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here