Ministra Finansa em ezersisiu, Sara Lobo Brites. Foto António Goncalves

DILI, (TATOLI) – Relasiona ho prosesu promulgasaun Orsamentu Jerál Estadu (OJE) 2019 hosi Prezidente Repúblika, Francisco Guterres Lú Olo, maka governasaun da-ualu sei foti osan milliaun $296 resin hosi konta Estadu hodi finansia mákina Estadu durante fulan janeiru.

“Saldu iha hodi sustenta ba fulan janeiru, kas iha fin do ano 2018 to’o ohin hamutuk milliaun $296”, haktuir Ministra Finansa en ezersísiu, Sara Lobo Brites, ba jornalista sira iha Parlamentu Nasionál, ohin.

Nia hatete hosi totál saldo sei sufisiente hodi selu saláriu funsionariu, tanba bazea ba esperénsia duodésimu iha tinan kotuk kada fulan gasta media milliaun $70.

Maibé desizaun uza duodésimu hosi konta Estadu ne’e sei deside iha reuniaun Konsellu Ministru kuarta aban iha Palásiu Governu.

“Ohin enkontru ho Primeiru-Ministru mós atu informa kona-ba posibilidade uza duodésimu maibé sei deside aban”, tenik tan.

Entretantu, desizaun ne’e hodi hein prosesu promulgasaun hosi Xefe Estadu.

Entretantu hafoin halo redasaun ikus, parlamentu enkamiña ona OJE 2019 ba Prezidénsia Repúblika iha loron 24 fulan-dezembru 2018 liubá.

Tuir artigu 88 lei-inan Nasaun nian kona-ba kompeténsia Xefe Estadu (promulgasaun no vetu) iha alinea 1) hatete prazu loron 30 nia laran, hahú hosi simu diploma naran ida husi Parlamentu Nasionál atu promulga hanesan lei, Prezidente-Repúblika bele promulga eh uza direitu vetu nian, hodi husu apresiasaun foun kona-ba lia-tatoli ne’e ho fundamentu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here