Reprejentante Espesiál Governu ba asuntu petróleu, Kay Rala Xanana Gusmão, akompaña hosi Primeiru-Ministru, Taur Matan Ruak, nomós membru governu sira, ohin halo esplikasaun ba deputadu sira kona-ba razaun sosa asaun hodi esplora mina no gás iha área Greater Sunrise hosi kompañia ConocoPhillips no Shell. Imajen Egas Cristovão

DILI, (TATOLI) – Reprejentante Espesiál Governu ba asuntu petróleu, Kay Rala Xanana Gusmão, husu ba bankada opozisaun sira atu haree interese nasionál.

“Opozisaun iha obrigasaun, haree buat hothotu. Tau interese nasionál. Ha’u sente ofendidu, ita-boot sira la satisfeitu”, deklara Xanana Gusmão liuhosi nia esplikasaun iha ámbitu husu no hatan iha plenária Parlamentu Nasionál, ohin.

Nia hatete tan: “Aban kedas, ha’u hakerek karta ba kompañia ConocoPhillips ho Shell atu faan ba ema seluk, tanba ita lakohi atu sosa asaun sira”, katak tan.

Xanana akresenta tau verba iha Orsamentu Jerál Estadu 2019 atu sosa asaun hirak ne’e mak ilegál ka la iha legalidade, nia husu ba opozisaun sira atu hateten ba Prezidente Repúblika hodi veta orsamentu. “Ha’u hatene opozisaun sira hakarak ataka malu de’it, tuir loloos atu husu pergunta tenke husu ho didiak”.

Reprezentante Governu ne’e hato’o diskulpa ba Primeiru Ministru tanba idade la permite ona atu nia aguenta ho falta maturidade iha uma fukun.

Entretantu, Vise Xefe Bankada Frente Revolusionária Timor-Leste Independete (FRETILIN), Francisco Miranda Branco, afirma atu halo karta ba kompañia ConocoPhilips ho Shell, ida ne’e la’os desizasaun opozisaun nian.

Nia dehan buat hotu tenke liuhosi prosesu, tenke ko’alia ba malu, konsulta malu, la’os asina depois mai obriga orgaun seluk atu aprova.

“Ami hakarak buat hotu klaru ba públiku, ko’alia kona-ba kadoras mai ita nia rai. Ida ne’e inkestionavél tanba ita hakarak buat di’ak hotu ba rai ne’e”, afirma.

Katak tan ita hakarak hatene loloos benefísiu saida mak sei lori mai no nia risku sira oinsá. Se risku boot ita labele halo investimentu no risku kiik no benefísiu barak ba povu ne’e ita hotu hakarak.

“Ami lamenta atitude Xanana nian maibé ohin emosaun entaun ita komprende, to’o ikus ami la hetan klarifikasaun”, lamenta.

OJE 2019 dadaun ne’e iha Xefe Estadu nia liman, nia sei konsulta ho lider polítiku sira, parte relijiozu, sosiedade sivíl no akademista sira hafoin bele foti desizaun.

Entretantu, Eis-Prezidente Repúblika, José Ramos Horta, louva ba eaplikasaun hosi Xanana tanba prosesu hotu esklaresidu no la iha tan duvida.

Nia espera Prezidente Repúblika sei promulga OJE 2019 nian atu rai ne’e bele ba oin no povu bele moris ho dignidade.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here