Kay Rala Xanana Gusmão. Foto António Goncalves

DILI (TATOLI) –Xefe negosiador prinsipál, Fronteira Marítima, Kay Rala Xanana Gusmão tuir ajenda sei halo esplikasaun (briefing) iha plenária Parlamentu Nasionál (PN), aban (Tersa-red) relasiona ho polítika estadu Timor-Leste nian, sosa asaun hosi kompañia ConocoPhillips ho Shell ba deputadu sira.

Vise Prezidente Parlamentu Nasionál, Maria Angelina Sarmento, informa aban, PN iha de’it ajenda úniku iha plenária tanba Xefe Negosidór Prinsipál, Kay Rala Xanana Gusmão sei esplika kona-ba polítika Estadu nian hodi sosa asaun ConocoPhillips ho Shell ba deputadu sira iha lejizlatura da-lima nian.

Vice PN, Maria Angelina Sarmento. Imajen Egas Cristovão

“Aban, iha ajenda úniku mak audiénsia governu no marka prezensa hosi Xefe Negosiadór Prinsipál, Kay Rala Xanana Gusmão hodi esplika ba deputadu sira kona-ba polítika Estadu nian hodi sosa asaun ConocoPhillips ho Shell,” Vice PN Deputadu Maria Angelina informa ba jornalista sira iha Parlamentu Nasionál, ohin.

Nia dehan objetivu hosi esplikasaun ne’e mak atu deputadu sira iha parlamentu bele iha koñesimentu ba desizaun polítika sosa asaun sira ne’ebé daudaun iha hela prosesu laran.

Esplikasaun hosi xefe negosiador ne’e sei akompaña hosi, Primeiru Ministru, Taur Matan Ruak, Ministru Petróleu no Rekursu Minerál, Agio Pereira, Tékniku sira hosi Timor Gap no Autoridade Nasionál Petróleu nian, sei partisipa iha plenária hodi halo esplikasaun.

Entretantu, prezensa Governu ho Xanana nia iha audiénsia aban, bazeia desizaun iha lider bankada sira iha semana kotuk, hafoin Prezidente Repúblika, Francisco Guterres Lú-Olo veta lei atividade petrolífera.

Ho ida ne’e, Bankada Kongresu Nasionál Rekonstrusaun Timorense (CNRT-Sigla Portugés), Bankada Partidu Libertasaun Populár (PLP) ho Kmanek Haburas Unidade Nasionál Timoroan (Khunto) hato’o rekerimentu ida ba parlamentu atu halo re-apresiasaun ba proposta lei primeiru aliterasaun ne’ebé mak prezidente veta tiha ona.

Hosi rekerimentu re-apresiasaun hosi bankada governu mak mosu ideia ida hosi deputadu sira opozisaun atu halo audiénsia ho governu no Xanana hodi esplika kona-ba objetivu hosi aliterasaun dahuluk lei atividade petrolífera, liuliu desizaun Estadu nian atu sosa asaun sira ne’ebé mak iha ona prosesu.

Jornalista : Zezito Silva

Editór : Manuel Pinto

HAKEREK NO HATÁN

Please enter your comment!
Please enter your name here