Sekretáriu Estadu Formasaun Profisonál no Empregu (SEFOPE), Julião da Silva. Foto/SEFOPE.

DILI (TATOLI)-Sekretáriu Estadu Formasaun Profisionál no Empregu (SEFOPE), Julião da Silva, informa SEFOPE ho Governu Austrália hahú ona halo ezersísiu kona-ba akordu Pacific Labour Scheme (PLS) nian atu nune’e iha tempu badak bele asina.

“Iha Austrália ne’e ita hetan programa ida ne’ebé iha tempu badak atu asina akordu ne’e maka kona-ba PLS. programa ne’e ema bá serbisu la’ós fulan neen, mas bá tinan tolu maibé ne’e kada tinan presiza ema liu husi rihun ida, mas MoU seidauk asina, agora ita dezenvolve ona kuandu ami halo ezersísiu maka’as, lalais, janeiru antes remata asina ona no kuandu asina hotu ona ita bele hahú ona prosesu rekrutamentu”, Julião katak iha Palásiu Governu ohin.

Sekretáriu Estadu ne’e dehan kona-ba PLS ne’e depende ba empreza sira presiza ema, maibé Timor-Leste mós tenke prepara nia ema tanba iha diferensa entre serbisu sazonál ho PLS nian.

“Diferente maka bá serbisu fulan neen ne’e unskilled labour (la’ós kualifikada), agora, bá tinan tolu ne’e tenke iha skilled labour (serbisu kualifikada) signifika sira ne’e tenke formadu tiha ona mak bá. Ezemplu ema presiza karpinteiru entaun tenke ema fomadu iha karpinteiru mak bá”, katak.

Julião hatutan iha tinan ne’e PLS presiza ema liu husi 1000, maibé daudaun ne’e Timor-Leste sei haree uluk MoU (memorandum of understanding) hafoin bele haree prosesu tuirmai no bainhira akordu ne’e iha ona maka timoroan balun bele dezloka bá ona.

Hatán kona-ba rekursu timoroan ne’ebé karik lato’o SEFOPE dehan ho ida ne’e maka iha orsamentu 2019 nian tenta para oinsá bele estabelese tan sentru formasaun iha nivel munisípiu sira.

“Kuandu sentru formasaun iha hotu ona, nune’e bele prodúz ema barak hodi responde ba merkadu”.

Sekretáriu Estadu ne’e mós afirma relasiona ho serbisu sazonál tuir kompormisu ne’ebé iha bá Austrália nian presiza ema 1500 kada tinan no Korea 2000.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here