Vise Prezidente Parlamentu Nasionál, Maria Angelina Sarmento. Foto Egas Cristóvão

DILI, (TATOLI) – Vise Prezidente Parlamentu Nasionál, Maria Angelina Sarmento, hatete durante fulan rua ka tolu nia laran, governu tenke kontinua ho rejime duodésimu hodi funsiona mákina Estadu.

“Ita hakarak ka lakohi tenke kontinua nafatin uza rejime duodésimu ba prazu fulan rua ka tolu nia laran hodi hein prosesu ne’ebé mak iha Prezidente Repúblika nia liman, ne’ebé ligadu ba OJE (Orsamentu Jerál Estadu) 2019 nian”, deputada hosi bankada Partidu Libertasaun Populár (PLP) ne’e ba jornalista sira iha uma fukun, ohin.

Tuir informasaun hosi Ministériu Finansa orsamentu disponivél atu kontinua normaliza mákina Estadu liuhosi rejime duodésimu, tanba verba 2018 prevee hotu osan hirak ne’e iha laran.

Entretantu hafoin halo redasaun ikus, parlamentu enkamiña ona OJE 2019 ba Prezidénsia Repúblika iha loron 24 fulan-dezembru 2018 liubá.

Tuir artigu 88 lei-inan Nasaun nian kona-ba kompeténsia Xefe Estadu (promulgasaun no vetu) iha alinea 1) hatete prazu loron 30 nia laran, hahú hosi simu diploma naran ida husi Parlamentu Nasionál atu promulga hanesan lei, Prezidente-Repúblika bele promulga eh uza direitu vetu nian, hodi husu apresiasaun foun kona-ba lia-tatoli ne’e ho fundamentu.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here