Prezidente Konsellu Konsultivu Fundu Petrolíferu (KKFP), Pe. Júlio Crispin, hamutuk ho membru KKFP dadalia ho jornalista sira hafoin sorumutu ho Xefe Estadu Lú Olo. Imajen Ajénsia Tatoli/Xisto Freitas

DILI (TATOLI)—Prezidente Konsellu Konsultivu Fundu Petrolíferu (KKFP), Pe. Júlio Crispin, informa, atualmente reseita ka fundu petrolíferu ne’ebé Timor-Leste iha ho montante biliaun $16.4.

Prezidente KKFP hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin relata montante fundu petrolíferu iha konfre Estadu ba Xefe Estadu Lú Olo.

Pe. Júlio haktuir katak Governu koloka fundu petrolíferu ho montante biliaun $1.8 ba orsamentu jerál Estadu (OJE) 2019, ne’e duni, fundu petrolíferu reduzidu ona ba biliaun $14 itál.

“Se merkadu finanseiru no merkadu investimentu ninia dinámiku nafatin hanesan agora, kerdizer montante fundu petrolíferu nafatin. Se dinámiku maka menus, entaun fundu petrolíferu mós sei menus,” nia esplika.

Amu Júlio afirma katak rendementu ba tinan ida ne’e la to’o miliaun $500, ne’e atu dehan katak defisit ba OJE 2019 ne’e purvolta biliaun 1.3  no biliaun 1.3 ne’e sei mai hosi fundu petrolíferu duke reseita hosi setór seluk.

Tanba ne’e, nia sujere ba Governu atu koloka orsamentu ba iha setór ne’ebé produtivu nune’e bele hatama lalais orsamentu ba kofre Estadu.

“Polítika sustentabilidade ne’e dehan katak agora ita bele foti orsamentu boot maibé tinan oin ne’e tenki iha orsamentu para ita bele uza nafatin. Tanba ne’e, ita tenki hili entre setór ne’ebé importante liu hanesan setór estrativa ka setór agrikultura nune’e bele fó osan ba ita iha tinan oin,” Prezidente KKFP tenik.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here