Logo Sensu Agríkola. Foto/MF.

DILI, (TATOLI) – Implementasaun pilotu Sensu Agrikóla ne’ebé hala’o iha 3-22 dezembru 2018 konsege entrevista umakain 2.261 ka porsentu 75 husi totál listajen umakain agrikultór hamutuk 3.021 iha munisípiu ualu no instituisaun 11 ne’ebé kategoria ba agríkola.

Diretór Jerál Estatístika Minitériu Finansas (MF), Elias dos Santos Ferreira, hatete iha pilotu ne’e serbisu iha terrenu la’o ho di’ak, maibé durante pilotu ne’e umakain balun liuliu iha área remota lakonsege hetan entrevista tanba afeta husi udan.

“Maibé en prinsípiu umakain sira ne’e simu ita-nia entrevistadór ho di’ak. Sira kontente tanba ita mós bele sukat sira-nia to’os no natar no rezultadu ne’e ita fó kedan ba sira tanba durante ne’e ita husu sira-nia natar, to’os ektare hira sira kalkula de’it, maibé depois ita uza GPS sira kontente tebes hatene natar no to’os ne’e luan hira”, Elias informa iha Kaikoli ohin.

Hatutan iha sensu ne’e husu pergunta barak liuliu ba to’os ne’e halo ka la’e no natar ne’e halai ka la’e no lahalai tanba saida? Ho rezultadu husi pilotu ida ne’e, tenta halo di’ak liu para iha marsu 2019 ne’e halo sensu agrikultura ida loloos ho didi’ak.

“Ita konsege duni hetan pesentajen ne’ebé maka boot, maibé presiza hadi’ak liután iha futuru”.

Iha rezultadu pilotu sensu agríkola 2018 ne’ebe halo iha munisípiu ualu hanesan Aileu konsege kobre umakain agrikultura porsentu 57.4, Bobonaru 55.5%, Baukau 70%, Kovalima 87.1%, Ermera 76.1%, Manufahi 93.8%, Oekusi 76.7% no Vikeke 87.1% husi totál listajen umakain 3.021.

Pilotu ba sensu agríkola ne’e bazea ba rezolusaun Governu númeru 23/2017 ne’ebé fó kompeténsia ba MF no MAP hodi halo Sensu Agríkola dahuluk iha Timor-Leste.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here