Jornada komemorasaun iha komemorasaun loron erói no aniversáriu Prezidente Nicolau Lobato mate. Foto: GPR

DÍLI, (TATOLI)-Prezidente Repúblika, Francisco Guterres, Lú-Olo, husu atu ita rekoñese ita-nia erói sira ho kompromisu boot tuir mai: Hamoris fila fali sira-nia domin metin ba Povu tomak no Nasaun Timor-Leste, iha ita idaidak no iha ita hothotu nia fuan.

“Domin metin ne´e mak lori eroi sira haburas aan no ita presiza hatuir mak fiar no hako´ak mehi ba maluk hothotu, brani, espiritu sakrifísiu, espiritu simu no tulun malu no rezilénsia,” dehan Prezidente Repúblika, Francisco Guterres, iha nia diskursu, iha rotunda Nicolau Lobato, Comoro-Díli, iha ámbitu komemora tinan 40, saudozu Nicolau Lobato nia mate, bainhira tiru malu ho militár indonéziu sira, iha Mindelo, Turiscai, Manufahi.

Tuir xefe estadu, domin ne’e mak halo kombatente idaidak hamriik ho laran luak, nakonu ho brani no fiar katak, mehi ukun rasik aan, biar susar atu hetan, sei nakfila ba realidade loron ruma.

Sira kaer metin mehi ukun rasik aan, atu hasa’e ita hothotu nia dignidade, nu’udar ema no nu’udar Povu no Nasaun. Sira mehi katak ukun ho justisa sosiál mak fó dalan ba hothotu hetan oportunidade hanesan, atu moris di‘ak. Mehi ne’e da’it ba Povu tomak no ita konsege duni halibur ita-nia ema atu tanen luta, biar hothotu hatene katak, ita sei liu husi susar no terus, ho rohan-laek, iha tempu ne’ebá.

Domin ne’e mak halo aswa´in sira habrani aan. Domin ne’e husu dedikasaun no sakrífisiu husi idaidak, husi família idaidak, iha knua idaidak. Aswa´in sira simu sakrifísiu no la sukat kolen to’o sira mate.

Nune’e ita bele hatete katak-domin ne’e mak lori aswa´in sira haluha sira-nia-an. Domin ne’e mak halo kombatente libertasaun nasionál idaidak kakoak espíritu simu no tulun malu.

Husi domin ne’e mak kombatente hothotu haburas sira-nia reziliénsia. Signifika sira fiar-an no fiar metin katak, iha kapasidade atu reziste, iha situasaun ne’ebé de’it, sai kriativu bainhira hasoru dezafiu foun, la deziste, aguenta presaun oioin no, entrega-an tomak ba luta, to’o loron hetan tiru no mate ka, to’o hetan mate, nu’udar konsekuénsia husi tortura iha kadeia, ka hetan moras oioin, nu’ udar konsekuénsia husi funu.

Reziliénsia hodi hatane-an no koñese realidade ho maneira seluk, hodi hakaat ba oin nafatin ho determinasaun no firmeza, atu defende ita-nia Povu no ita-nia rai!

Funu naruk no susar ne’e hamosu eróis rohan-laek no barak mak ita la hatene naran, ohinloron. Sira-nia ruin lekar iha foho leten ka rai tetuk, raan fakar iha kampu luta ka iha kadeia no, isin-tomak soe ba tasi ka iha ailaran, maibé, espíritu luta la mate iha ita-nia rai doben ida ne’e. “TUBA RAI METIN, UKUN RASIK-AN, “ PÁTRIA OU MORTE! VENCEREMOS!”, ita hakilar.

Rihun ba rihun simu sakrifísiu hodi ita, ohin loron, manán orgullu no moris ho dignidade, nu’udar Estadu, nu’udar mós Nasaun!

“Oan-ki’ak no faluk sira sei halerik hela. Ita halerik hamutuk ho sira ohin, no ba oin, ho kompromisu atu haburas babeibeik domin no respeitu malu, atu ita bele hetan mehi boot ida tan, ne’ebé ita-nia erói sira labele halo rasik. Mehi boot ne’e mak: hakotu ki’ak iha rai doben ida ne’e no haburas justisa sosiál ba sidadaun hotu-hotu,” konsidera Prezidente Repúblika.

 Jornalista: Rafy Belo

Editór : Manuel Pinto

 

HAKEREK NO HATÁN

Please enter your comment!
Please enter your name here