Prezidente Repúblika Kondekora Defisiente Na’in Rua

0
81
Prezidente Repúblika kondekora Medalla Méritu ba atleta defisiente Teófilo Freitas. Imajen Mídia PR

DILI (TATOLI)—Haree ba Dekretu-Lei númeru 15/2009 no hafoin rona Konsellu Agrasiamentu no Órdens Onorífikas, Prezidente Repúblika foti desizaun kondekora joven difisiente na’in rua ho Medalla Méritu liuhui komemorasaun Loron Mundiál ba Difisiente iha Palásiu Prezidente Nicolau Lobato, Bairru Pité, segunda ne’e.

Prezidente Repúblika atribui Medalla Méritu ba atleta defisiente Pascoela Pereira dos Santos. Imajen Mídia PR

Kondekorasaun ne’e nu’udar aktu rekoñesimentu ba Teófilo Freitas no Pascoela Pereira dos Santos ne’ebé maske ho kondisaun difisiente maibé iha abilidade iha área desportiva, kontribui ba estabilidade nasionál no pás liuhusi atividade desportiva, kontribui hodi hasa’e liu-tan orgullu nasionál no hasa’e prestíjiu Timor-Leste nian iha rai-li’ur.

Xefe Estadu hateten primeiravez mak Timor-Leste manán iha kompetisaun internasionál liuhusi eventu desportu boot liuhotu iha Ázia ba paratleta sira (Asian Paragames iha fulan kotuk), iha ne’ebé paratleta na’in rua manán medalla osan mean rua no osan mutin ida.

“Medalla osan mean ne’ebé Teófilo manán hasa’e liu-tan prestíjiu Timor-Leste nian tanba ita-nia bandeira hasa’e iha arena internasionál, akompaña ho ita-nia inu nasionál “Pátria, Pátria”,” Lú Olo haktuir.

Nia hatutan, Konsellu Agrasiamentus no Órdens Onorífikas sei rekolla dadus hosi manan-na’in sira seluk, atu hetan mós rekoñesimentu hosi Estadu Timor-Leste.

“Ohin Estadu Timor-Leste rekoñese de’it talentu joven rua nian, iha área desportiva, maibé ita iha mós talentu seluk ne’ebé ita tenke identifika, rekoñese no haburas ba beibeik ho apoiu hosi Estadu, hosi organizasaun naun-governamentál, nasionál no internasionál, no hosi família no komunidade rasik,” Lú Olo dehan.

Iha biban ne’e, treinadora hosi atleta Teófilio Freitas halo krítika hasoru Governu tanba Governu liuhui Sekretaria Estadu Juventude no Desportu hamenus osan prestasaun nian ho montante Mil $80 ba Mil $60.

Treinadora ne’e reklama katak razaun saida hamenus osan no loloos labele hamenus tanba antes ne’e desidi atu mantein montante osan refere, ne’e duni, nia husu ba Prezidente Repúblika atu ajuda rezolve problema ida ne’e basá viola direitu atleta refere

Entretantu, Xefe Estadu Lú Olo deklara katak nia labele fó solusaun imediata maibé iha tempu oin mai nia sei ko’alia ho Primeiru-Ministru, Taur Matan Ruak, atu buka solusaun ba asuntu ida ne’e.

Jornalista: Xisto Freitas

Editór : Manuel Pinto

HUSIK IDA HATÁN