PR: Korrupsaun Kontribui Ba Violasaun Direitus Umanus

0
147
Prezidente Repúblika, Francisco Guterres Lú Olo. Imajen António Goncalves

DILI, (TATOLI) – Prezidente Repúblika, Francisco Guterres Lú Olo, hateten korrupsaun mós kontribui ba violasaun direitus umanus.

“Horisehik (9/12), Loron Internasionál Kombate Korrupsaun. Prezidente Repúblika bolu atensaun beibeik katak korrupsaun kontribui atu hasa’e kiak no korrupsaun mós kontribui ba violasaun direitus umanus”, Xefe Estadu dehan iha seremónia atribuisaun Prémiu Sérgio Vieira de Mello ba dala 11 ba entidade individu no organizasaun liuhusi komemorasaun Loron Mundiál Direitus Umanus ba dala 70 ne’ebé hala’o iha Palásiu Prezidente Nicolau Lobato, Bairru Pité, segunda ne’e.

Nia dehan kiak hanesan kauza no produtu hosi violasaun direitus umanus, tan ne’e, bainhira la hatún kiak, sei la garante direitu báziku sidadaun sira-nian.

Prezidente husu ba Governu no instituisaun relevante sira tenke buka nafatin atu adota polítika públika ne’ebé promove no proteje direitus umanus hanesan halakon diskriminasaun hasoru feto no grupu vulnerável hotu-hotu, halakon violénsia doméstika no prevene tráfiku oi-oin ne’ebé mosu dadauk iha rai ida ne’e no kombate korrupsaun.

Lú Olo mós hateten sidadaun hotu-hotu tenke iha asesu ba justisa, sistema judisiál tenke independente, rigorozu no justu, instituisaun prizionál sira tenke garante direitu báziku elementár ba dadur sira.

“Hamutuk ita hotu tenke harii ponte hodi liga ba malu, hodi habelar liu-tan diálogu permanente no konstrutivu, hodi defende no proteje direitu ema hotu-nian hanesan direitu sosiál, polítiku, sivíl, ekonómiku no kulturál, hodi Timor-Leste buras liu-tan hanesan rai ida ne’ebé prósperu no inkluzivu”, nia haklaken.

Jornalista: Xisto Freitas

Editora: Rita Almeida

HUSIK IDA HATÁN