iklan

NASIONÁL, POLÍTIKA

PN Aprova Orsamentu Ba MOP

PN Aprova Orsamentu Ba MOP

Debate OJE 2019 iha espesialidade. Imajen Egas Cristovão

DILI, (TATOLI) – Parlamentu Nasionál (PN) liuhosi votasaun iha diskusaun espesialidade Orsamentu Jerál Estadu (OJE) 2019 iha kuarta ne’e aprova verba ba Ministériu Obras Públikas (MOP) ho montante milliaun $154,839 ho votu a favor 43, kontra 2 no abstensaun 20.

Osan sira ne’e koloka ba saláriu no vensimentu milliaun $5,121, bens no servisu milliaun $128,457, transferénsia públika milliaun $1, kapitál menor milliaun $3.401, no kapitál dezenvolvimentu milliaun $16,860.

Despeza boot liu ba orsamentu ministériu ne’e iha Diresaun Jerál Eletrisidade ba kategoria bens no servisu ho montante milliaun $90,898, enkuantu dotasaun ba Diresaun Jerál Agua, Saneamentu no Urbanizasaun hamutuk milliaun $12,881.

Ba orsamentu MOP iha proposta 15, hafoin diskusaun deputadu proponente retira balun no balun konsege avansa ba votasaun, maibé ba proposta redusaun despeza husi bankada opozisaun Frente Revolusionária Timor-Leste Independente (FRETILIN) no Partidu Demokrátiku (PD) kuaze la aprovadu.

Entretantu, orsamentu ba MOP tinan 2019 sa’e kompara ho 2018 ne’ebé ho montante milliaun $100,816, ho dotasaun ba saláriu no vensimentu milliaun $5,062, bens no servisu milliaun $91,946, transferénsia públika $527.000, kapitál menor $250.000 no kapitál dezenvolvimentu milliaun $3,031.

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!