OJE 2019, Governu Fó Prioridade Ba Área Lima

0
226
Foto/GPM.

DILI, (TATOLI) – Primeiru-Ministru, Taur Matan Ruak, hateten proposta lei Orsamentu Jerál Estadu (OJE) 2019 governu propoin ba área lima mak infraestrutura, dezenvolvimentu kapitál sosiál, dezenvolvimentu ekonómiku, konsolidasaun governativa no kombate korupsaun bazea ba Planu Estratéjiku Dezenvolvimentu Nasionál (PEDN) 2011 to’o 2030.

Xefe Governu iha ninia diskursu hateten infraestutura bázika nu’udar baze fundamentál, ba diverfisikasaun, dezenvolvimentu ba sustentabilidade ekonomia hodi kore án hosi dependénsia ba fundu minarai.

Dezenvolvimentu ekonomia, tuir Xefe Ezekutivu sei dinamiza setór privadu no promove tranzasaun ekonómika iha setór agrikultura, turizmu, indústria komérsiu, finansa no esportasaun.

Iha diversifikasaun ekonomia ba 2019 promosaun kresimentu no diversifikasaun ekonomia nasionál no lokál hodi prevee aselerasaun ba kresimentu hosi produtu internu brutu (PIB real la’ós petrolíferu porsentu 5,9) no taxa inflasaun tun iha orden porsentu 2,7.

“Ba kondisaun moris nian ne’ebé di’ak liu atu hadi’a no lori servisu besik liu ba sidadaun, liuliu edukasaun, saúde, abitasaun, bee, saneamentu, eletrisidade, enkuntu ba koezaun atu hamenus diferensa ne’ebé eziste entre sidade no rurál hodi fó dalan ba dezenvolvimentu foun sira ne’ebé oras ne’e akontese iha RAEOA (Rejiaun Administrativa Espesiál Oekusi-Ambenu) no Zona Espesiál Ekonomia Sosiál no Merkadu (ZEESM)”, esplika xefe ezekutivu.

Estabelese liña estrada no transporte hanesan ponte, estrada urbana no rurál, aeroportu, portu, estrutura lojístika no operasionál, rede informasaun no teknólojia foun sira.

Iha kapital sosiál, Governu hakarak promove moris di’ak ba sidadaun, liuliu iha edukasaun no formasaun tékniku vokasionál hodi prepara sidadaun ne’ebé iha kualifikadu, kapasidade produtivu hodi kontribui ba dezenvolvimentu ekonomia.

“Saúde hakarak sidadaun ne’ebé saudavel ho kualidade moris nian ne’ebé di’ak liu ho polítika ida di’ak ba saúde família, protesaun sosiál governu hakarak estabelese modelu seguransa sosiál rua hanesan rejime kontributivu seguransa sosiál no rejime la’ós konstributivu”, tenik.

Konsolidasaun governativa, governasaun da-ualu hakarak hametin prosesu alokasaun rekursu públiku hosi modelu integradu dezenvolvimentu no jeneralizasaun jestaun públika liuliu dezenvolve kultura dezempeñu, rigór, transparénsia, profesionalizmu ho kualidade.

Prioridade ida seluk hosi konsolidasaun ne’e maka abordajen integrada ida no implementasaun modelár ida hosi reforma lejizlativa, reforma jestaun kona-ba finansa públika, reforma fiskál no reforma administrasaun públika.

“Ha’u agradese ba ita-boot sira nia jenerosa atensaun no lori governnu konstitusionál VIII nia naran, ha’u hato’o dala ida tan solitasaun solene ba parlamentu nasionál atu aprova projetu kona-ba proposta lei orsamentu jerál Estadu 2019 ho montante totál $1.827 (dollar amerikanu billiaun ida no atus ualu no rua nulu resin hitu)”, ezekutivu solisita deputadu hodi aprova OJE 2019.

Jornalista: Agapito dos Santos

Editora: Rita Almeida

HUSIK IDA HATÁN