Kooperasaun Alemanã Aprezenta Rezultadu Implementasaun Projetu Agroflorestál

0
51
Foto/Google.

DILI, (TATOLI) – Kooperasaun Alemaña iha Timor-Leste serbisu hamutuk ho Ministériu Agrikultura no Peska (MAP) no Uniaun Europeia (UE), aprezenta rezultadu implementasaun projetu agroflorestál ho naran Parseria ba Agroflorestál Sustentavel iha Timor-Leste durante tinan ida, liuhosi workshop iha JL Villa, ohin.

Projetu ne’e hadi’a liután asesu rurál, kriasaun empregu, oportunidade hasa’e rendimentu, redús inseguransa ai-han ho má nutrisaun iha área rurál.

Rezultadu husi faze inisiál implementasaun projetu, sei hadi’a liután asesu ba merkadu ba produtu agrofloresta sira (agrikultura, hortikultura no produsaun no prosesamentu ba ai). Inklui, reforsa kuadru instituisionál no organizasionál atu bele promove agrofloresta ida ne’ebé sustentavel.

Projetu ne’e iha komponente rua, komponente primeiru mak dezenvolve sistema agrofloresta ida ne’ebé sustentavel no sei implementa husi GIZ (kooperasaun internasionál alemaña-sigla iha alemaun), serbisu hamutuk ho MAP ho instituisaun relevante sira.

Komponente primeiru ne’e iha totál orsamentu euro milliaun 18 ne’ebé UE kontribui euro milliaun 13 no Governu Alemaña kontribui euro milliaun lima.

Komponente segundu kona-ba hadi’a asesu ka hadi’a estrada ba área rurál sira, liliu ba área sira ne’ebé projetu agrofloresta ne’e atu implementa ba.

Segundu komponente ne’e sei implementa husi ILO (Organizasaun Mundiál Traballu-sigla iha inglés) ho fundu husi UE hamutuk euro milliaun 12,2.

Sistema agrofloresta nu’udar sistema ida ne’ebé buka atu jere didi’ak terenu halo to’os nian sira, atu nune’e iha terenu ida la’ós kuda buat oin ida de’it, maibé bele kuda buat oioin hanesan ai-horis floresta, ai-horis kultiva no haki’ak mós animál iha ne’ebá.

Reprejentante MAP, Fernandinho Viera da Costa, ne’ebé partisipa mós iha workshop ne’e konsidera dezenvolvimentu floresta importante, tanba floresta mak dezenvolvimentu seluk bele hala’o iha fatin refere.

“Dezenvolvimentu floresta durante ne’e hala’o ho ita-nia kbiit, ita-nia forsa, ita-nia tékniku sira ne’ebé mak iha bazea ba ita-nia kapasidade finanseiru ne’ebé mak aprova husi Ministériu Agrikultura i Peska”, hateten Fernandinho Viera da Costa ba jornalista sira.

Reprejentante ne’e katak dezenvolvimentu agroflorestál ne’ebé mak MAP halo ona mak konservasaun ba Parke Nasionál Nino Konis Santana, Lospalos, define ona área protejida hanesan área protejida 46 iha Timor-Leste nomós dezenvolvimentu plantasaun ai-kameli iha suku Aidaba leten, postu administrativu Atabae, munisípiu Bobonaru, ektáre 150.

“Alende ida ne’e ita dezenvolve área floresta, liuliu harii plantasaun ba ai-teka, ai-saria, ai-naa hanesan ai nativu ba Timor-Leste nian, ne’ebé mak ita dezenvolve sai hanesan ekonomia ba nasaun nian aban bainrua”, dehan tan reprejentante MAP ne’e.

Fernandinho Viera da Costa akresenta sei akontese tesi ai arbiru tanba limitasaun rekursu umanu, liliu membru guarda floresta sira hodi asegura no proteje floresta sira.

“Iha área balun deskontroladu, tanba ita iha membru guarda floresta ne’ebé mak limitadu, área ne’ebé mak luan tebes maibé ita konsege halo atuasaun balun ne’ebé mak ita-nia guarda floresta halo, hanesan prende ai sira ne’ebé mak tama ilegál mai Dili laran nomós guarda floresta sira ne’ebé mak destaka iha postu administrativu no munisípiu, sira halo patrulla, preventiva ba ita-nia área ne’ebé mak poténsia ba dezenvolvimentu ekonomia”, haktuir.

Nia katak guarda floresta mós iha limitasaun; fasilidade, transporte no komunikasaun. “Ida ne’e mak difikulta sira para hala’o sira-nia serbisu máximu. Maibé realidade, kondisaun ida ne’e ami la apar ho ida ne’e, ami kontinua serbisu nafatin tanba atu guarda, defende ita-nia floresta, iha ita-nia rai doben Timor-Leste”.

“Ba oin, ami hakarak ita-nia suku ida, ita-nia guarda floresta ne’e destaka iha ne’ebá, tanba ne’e sira hala’o sira-nia koordenasaun, konsultasaun ho ita-nia autoridade lokál sira; xefe suku, xefe aldeia, xefe postu administrativu sira para bele haree, salvaguarda ita-nia área floresta”, espera Fernandinho Viera da Costa.

Entretantu partisipa iha workshop ne’e, alende MAP liuhusi nia reprejentante, inklui mós embaxadór UE nian ba Timor-Leste, Alexandre Leitão, nomós parseiru dezenvolvimentu sira ne’ebé ligadu ba área floresta nian.

 Jornalista: Rafy Belo

Editora: Rita Almeida

HUSIK IDA HATÁN