Governu Ho Ninia Parseiru Lansa Aplikasaun Rede no Pakote ba Mídia

0
59
Governu reprezenta hosi SEKOMS no SEII hamutuk ho parseiru sira, ohin lansa aplikasaun rede no pakote ba mídia iha Praia dos Coqueros. Imajen Egas Cristovão

DILI, (TATOLI) – Governu Timor-Leste ho  ninia parseiru hanesan Australian Aid, Catalpa Internasionál, Nabilan no Fundasaun Ázia, ohin lansa aplikasaun www.hamahon.tl rede referál no pakote rekursu ba mídia kona-ba prevensaun violénsia kontra feto.

Governu reprezenta hosi Sekretáriu Estadu Komunikasaun Sosiál, Merício Juvenal dos Reis Akara, Sekretária Estadu ba Igualdade no Inkluzaun, Maria José da Fonseca Monteiro de Jesus, no Kargu Ofisiál hosi Governu Austrália Phillipa Venning, lansa aplikasaun ne’e iha edifísiu Fundasaun Ázia Praia dos Coqueiros.

“Aplikasaun foun ne’e bele salva vítima sira hosi violénsia doméstika nomos tulun sira atu asesu ho lais ba apoiu sira ho kualidade no di’ak”, hateten Kargu Ofisiál ba Governu Austrália, Phillipa Venning, durante lansamentu.

Catalpa Internasionál maka dezeña aplikasaun ne’e hodi halibur informasaun detallu kona-ba apoiu servisu ba feto no labarik hodi ajuda polísia, fornesedór servisu, feto sira hodi hetan apoiu intervensaun ba violénsia bazea ba jéneru.

Reprezentante governu Austrália ne’e realsa lansamentu ohin parte ida importante hosi programa nabilan ne’ebé implementa hosi Fundasaun Ázia hodi hasa’e kualidade servisu ba prevensaun violénsia kontra feto no labarik.

“Servisu hasa’e eliminasaun violénsia kontra feto sei nafatin prioridade ba programa apoiu dezenvolvimentu hosi Austrália no ami orgullu atu apoiu papel lideransa governu ne’ebé forte iha asuntu ne’e”, realsa tan.

Governu Austrália liuhosi ninia ajénsia Australian Aid iha ona kompromisu apoiu Governu no sosiadade sivíl ho orsamentu milliaun $24 durante tinan ualu ba programa hapara violénsia kontra feto no labarik.

Bazea ba rezultadu estudu hosi Programa Nabilan iha 2015 kona-ba saúde no esperénsia moris, porsentu 59 feto sira hetan violasaun fízika no seksuál hosi sira nia parseiru durante sira nia moris. Porsentu 47 feto hetan preval’ensia trauma no abuzu ba labarik aas.

SEKOMS, Mericío Juvenal dos Reis Akara, hateten sei dezenvolve manuál ida kona-ba violénsia bazea ba igualdade jéneru hodi fasilita jornalista iha intermus kobertura no hakerek notísia.

“Durante ne’e laiha padraun formál, tanba ne’e ida-idak interpreta hodi halo notísia maibé depois mosu krítika”, hateten Governante ne’e.

Jornalista: Agapito dos Santos

Editora: Rita Almeida

HUSIK IDA HATÁN