Desizaun Prezidente Repúblika Ne’e Soberana

0
166
Primeiru-Ministru, Taur Matan Ruak, hafoin sorumutu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité. Imajen António Goncalves

DILI (TATOLI)—Primeiru-Ministru, Taur Matan Ruak, hateten desizaun Prezidente Repúblika ne’e soberana, tan ne’e laiha ema ida maka halo presaun ba Prezidente Repúblika atu promulga ka lae orsamentu jerál Estadu (OJE) 2019.

“Normalmente ne’e desizaun soberana. Prezidente Repúblika sei estuda molok ezérse ninia kompeténsia. Uluk ha’u nia tempu ha’u veta no haruka fila fali ba Parlamentu hodi hadi’a. Iha istória Timor ne’e ha’u maka primeiravez veta orsamentu jerál Estadu. Ne’e signifika Prezidente Repúblika iha nia kna’ar rasik,” Xefe Governu ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin hala’o enkontru ho Prezidente Repúblika, Francisco Guterres Lú Olo, kona-ba prosesu OJE 2019 no asuntu seluk tan.

Maibé, nia dehan, bainhira haree ba iha tinan 2017, kresimentu laiha no tinan 2018 kresimentu bulelo oituan no orsamentu tinan 2019 ho objetivu atu rekopera kresimentu, tan ne’e, bainhira tinan 2019 laiha orsamentu, sei laiha kresimentu.

“Projesaun ne’e kresimentu ekonomia tenke to’o iha pursentu 4.9 (4.9%). Karik maka ita falla tan, kresimentu sei laiha, nasaun la la’o no osan la sirkula, entaun ita paraliza ita-nia nasaun. Purtantu, ho buat sira ne’e hotu ita haree ezersísiu ida ne’ebé sériu liu. Tanba ne’e maka ha’u fiar katak Prezidente Repúblika sei iha tempu para halo avaliasaun di’ak tuir nia konsiénsia,” Taur esplika.

Iha biban ne’e, Primeiru-Ministru mós hato’o ba Xefe Estadu kona-ba akontesementu udan no anin sobu komunidade nia uma, eskola no kapela iha Lautem, Baucau no Viqueque, kuarta (26/12) madrugada.

“Iha dadus prelimináriu ne’ebé ha’u hetan katak sasán lubuk ida maka hetan estragu liu-liu ai monu afeta ba populasaun nia to’os no uma. Dadus seidauk kompletu, tanba ne’e maka ministériu sira hahú serbisu maka’as para konfirma dadus no haree oinsá atu fó asisténsia ba populasaun ne’ebé afetadu ba dezastre naturais refere,” nia tenik.

Nia haktuir, informasaun ne’ebé Xefe Governu hetan katak laiha ema maka mate iha akontesementu ne’e maibé iha na’in ida maka hetan kanek.

Jornalista: Xisto Freitas

Editór : Manuel Pinto

HUSIK IDA HATÁN