Afonso Lopez Nomeadu Ba Ajuntu Prokuradór Jerál Repúblika

0
152
Adjuntu Prokuradór Jerál Repúblika (PJR), Afonso Lopes, ohin simu pose hosi Prezidente Repúblika, Francisco Guterres Lú Olo, iha Palásiu Prezidente Bairru Pité. Imajen António Goncalves

DILI (TATOLI)—Prokuradór Afonso Lopez nomeadu sai adjuntu Prokuradór Jerál Repúblika hodi troka antiga adjunta Prokuradora Jerál Repúblika, Zélia Trindade, ne’ebé nia mandatu ramata ona iha setembru liu-ba.

Afonso nomeadu hosi Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, tersa ne’e, tuir dekretu Prezidente Repúblika nú. 34/2018.

Tuir Konstituisaun RDTL artigu 86 aliña L konjugadu ho númeru 6 artigu 133 dehan asuntu nomeasaun,  demite no ezonera adjuntu Prokuradora Jerál Repúblika sai hanesan kompeténsia eskluziva Prezidente Repúblika.

Emposadu Afonso hateten onra boot ba nia tanba Xefe Estadu bele nomea nia hodi okupa kargu refere no kompromete katak nia sei asumi kargu ne’e ho umildade no sei hatúr loloos responsabilidade ne’ebé fó ba nia.

“Lealdade no integridade nu’udar valór ne’ebé ha’u lori ho abut metin ba ha’u nia formasaun hanesan ema ,” nia subliña.

Afonso esplika, kna’ar adjuntu Prokuradór Jerál Repúblika atu koajuva ka tulun dignísimu Prokuradór Jerál Repúblika hodi tau-matan ba kazu sira ne’ebé aprezenta ba Ministériu Públiku no kazu sira seluk iha Ministériu Públiku.

Iha fatin hanesan, Prezidente Repúblika, Francisco Guterres Lú Olo, hateten nia fiar ba kapasidade adjuntu Prokuradór Jerál foun no hein katak iha inísiu funsaun ba kargu foun ne’e bele rezolve problema sira ne’ebé iha Prokuradoria Jerál Repúblika  hanesan falta seleridade prosesuál ne’ebé oras ne’e eziste no demora iha abtensaun justisa.

Nia husu ba adjuntu refere atu koopera ho Prokuradór Jerál Repúblika atu halo serbisu iha Prokuradoria Jerál Repúblika no nia fiar katak ho serbisu ekipa sei rezulta prestasaun serbisu ne’ebé di’ak.

Jornalista: Xisto Freitas

Editór : Manuel Pinto

HUSIK IDA HATÁN