ADTL Husu Estadu TL Ratifika Konvensaun Ba Ema Ho Defisiénsia

0
29
Defisiente sira bainhira hatudu sira nia talentu iha desportu liuhusi komemorasaun Loron Mundiál ba Ema ho Defisiénsia ne’ebé hala’o iha Palásiu Prezidente Nicolau Lobato, segunda ne’e. Imajen Mídia PR

DILI (TATOLI)—Responsável Asosiasaun Defisiénsia Timor-Leste (ADTL), Cesario da Silva, husu ba Estadu Timor-Leste (TL) atu ratifika Konvensaun ONU kona-ba Direitu Ema ho Defisiénsia.

Tuir nia katak konvensaun ne’e importante tebes tanba proteje direitu ema ho defisiénsia iha prosesu oi-oin ne’ebé liga ba dezenvolvimentu nasaun.

 “Tempu ona atu ratifika konvensaun ida ne’e. Ami-nia preparasaun serbisu hamutuk ho Governu no Estadu ne’e prontu ona,” Cesario dehan liuhusi ninia intervensaun iha komemorasaun Loron Mundiál Ba Ema ho Defisiénsia ne’ebé hala’o iha Palásiu Prezidente Nicolau Lobato, Bairru Pité, segunda ne’e.

Nia informa katak nia lamenta ho aplikasaun inkluzaun sosiál iha nasau ida ne’e tanba realidade la tau iha prátika.

“Dadaun ne’e ema hotu-hotu dehan inkluzasaun sosiál, maibé realidade la tau iha prátika. Durante ne’e ami akompaña situasaun ba ministériu relevante sira bainhira sira ko’alia kona-ba asuntu defisiénsia, sira dehan imi ba Ministériu Solidariedade Sosiál no Inkluzaun. Ami nia pergunta. Tanbasá Ministériu Sosiál de’it maka haree asuntu ne’e? Ministériu sira seluk hanesan Obras Públikas, Infraestrutura no Sekretaria Estadu Desportu mós tenke hanoin ona kona-ba inkluzaun, la’ós sosiál nia serbisu de’it,” Cesario tenik.

Nia afirma, asuntu defisiénsia ne’e la’ós ema ida nian no la’ós ema ho defisiénsia nia problema de’it maibé hotu-hotu nia problema.

Cesário esplika katak Timor-Leste adopta Objetivu Dezenvolvimentu Sustentável ne’ebé ho nia prinsípiu fundamentu ida dehan “live no one behind” ka “labele husik hela ema ruma iha kotuk”, maibé situasaun real ema ho defisiénsia no grupu vulnerável sira iha hela kotuk iha dezenvolvimentu rai ida ne’e nia laran.

“Tanba ne’e, asosiasaun advoka nafatin atu serbisu ho entidade hotu-hotu atu ita hamutuk atinji objetivu ida ne’e atu lori ema hotu avansa iha fileira ida ne’ebé hanesan iha prosesu dezenvolvimetu nia laran,” nia subliña.

Responsável ADTL ne’e haktuir, komemorasaun Loron Mundiál Defisiénsia ba tinan ida ne’e diferente tebes ho tinan sira liu-ba tanba tinan ida ne’e bele komemora iha Palásiu Prezidénsia Repúblika, iha ne’ebé partisipa hosi reprezentante órgaun soberania sira, entaun ida ne’e hanesan onra no previléjiu boot ba sira.

Komemorasaun refere hetan apoiu másimu hosi Governu Austrália liuhusi Partnership For Human Development iha Timor-Leste, Ministériu Solidariedade Sosiál Inkluzaun no Gabinete Prezidente Repúblika inklui ADTL.

Iha parte seluk, Prezidente Repúblika, Francisco Guterres Lú Olo, afirma Governu oi-oin halo ona buat barak atu atende nesesidade espesiál sira liu-liu ema ho defisiénsia, maibé seidauk natón, tan ne’e, presiza haree mós oinsá hamosu infraestrutura espesiál, eskola inkluziva no buat seluk tan atu bele aproveita potensiál matenek ho efisiénsia, hosi maluk sira ne’ebé iha nesesidade espesiál.

“Problema boot liu ne’ebé ha’u preokupa liu maka trauma. Ita hotu-hotu hatene katak funu hamosu emosaun oi-oin no ita-nia ema barak teb-tebes maka hetan problema iha sira-nia saúde mentál. Balu mate ona maibé barak sei moras hela. Ita seidauk iha servisu di’ak no fatin loloos atu tau matan ba sira ne’ebé hetan moras mentál. Ho laran taridu maka ha’u simu informasaun katak família barak maka kesi sira ne’ebé hetan moras mentál,” Lú Olo dehan.

Xefe Estadu  husu ba entidade relevante sira atu haree lalais oinsá tau matan ba sira ne’ebé hetan moras mentál, ho razaun ne’ebé de’it.

Iha fatin hanesan, Vise Ministra Solidariedade Sosiál no Inkluzaun, Signi Verdial, hateten komponente tolu hanesan inkluzivu, egolitáriu no dezenvolvimentu sustetável importante teb-tebes hodi asegura katak laiha ema ruma maka husik hela iha kotuk iha dezenvolvimentu nomós iha aspeitu hotu hosi moris públiku hanesan arte, kultura no desportu.

“Situasaun ema ho defisiénsia iha Timor hatudu iha duni komplesidade lubun ida. Ida ne’e nesesita planeiamentu ida integradu ne’ebé involve ministériu relevante sira hotu nomós liuhusi parseria ho organizasaun naun governamentál sira ne’ebé serbisu duni iha área ida ne’e,” nia esklarese.

Nia hatutan, komplesidade ne’e mós hatudu liuhusi estatístiku iha sensus 2015 hatudu katak purvolta Mil 38 no Demografy Health Survey hatudu purvolta Mil 52 ema ho defisiénsia nomós iha sensus ne’e deskobre katak ema ho defisiénsia hamutuk mil 25 resin maka nunka asesu ba iha eskola.

Signi esplika katak Ministériu Solidariedade Sosiál no Inkluzaun halo ona mudansa ba nia postura no programa, nune’e kria tiha ona diresaun nasionál ida ba promosaun no protesaun direitu ema ho defisiénsia.

Tanba asuntu ne’e kompleksu, nia dehan, Ministériu refere tau ona planu lubun ida atu bele implementa no prioridade boot liu maka sei halo revizaun ba polítika nasionál ba promosaun no protesaun ba ema ho defisiénsia nomós sei revé fila fali planu asaun foun ba tinan 2019 no tinan 2023.

“Planu asaun asaun ne’e deskobre katak ita presiza hametin koordenasaun serbisu entre ministériu relevante sira hodi asegura implementasaun ba polítika no programa ba ema ho defisiénsia,” nia hateten.

Signi tenik Ministériu Solidariedade Sosiál no Inkluzaun mós tau prioridade ba kria kondisaun hotu atu bele estabelese lalais Konsellu Nasionál ba ema ho defisiénsia, katak, Konsellu ne’e sei sai órgaun independente ida hodi halo koordenasaun ba implementasaun polítika nasionál no planu asaun nasionál ba ema ho defisiénsia.

“Bainhira kondisaun hotu estabelese ona, bele loke dalan ba Timor-Leste atu asina no ratifika Konvensaun ONU kona-ba direitu ema ho defisiénsia,” nia haklaken.

Komemorasaun ba tinan ida ne’e, Gabinete Prezidente Repúblika fasilita jardin Palásiu Nicolau Lobato ba ema ho defisiénsia hodi promove sira nia produtu iha área oi-oin nomós fasilita almosu konfratenizasaun.

Loron 3 Dezembru nu’udar Loron Mundiál ba Ema ho Defisiénsia ne’ebé bazeia ba Rezolusaun Asembleia Jerál ONU nú.47/3 iha tinan 1992.

Jornalista: Xisto Freitas

Editór : Manuel Pinto

HUSIK IDA HATÁN