Aban, PN Sei Debate OJE 2019

0
255
Prezidente Parlamentu Nasionál, Arão Noé. Imajen António Goncalves

DILI (TATOLI)—Parlamentu Nasionál (PN), aban (Kinta) sei debate Orsamentu Jerál Estadu (OJE) 2019 iha parte jeneralidade iha Plenária, debate ne’e sei hetan partisipasaun hosi Primeiru Ministru (PM) Taur Matan Ruak ho membru governu hotu.

“Ajenda ne’ebé aprova ona iha reuniaun lider bankada maka ko’alia kona-ba debate OJE, ne’ebé sei monu iha 6 Dezembru iha jeneralidade,” Prezidente PN, Arão Noe ba jornalista sira iha uma fukun, ohin.

Nia esplika, ajenda debate ba Proposta Lei OJE 2019 ne’e, hahú iha dia 6 Dezembru iha jeneralidade durante loron tolu. Dia 7 to’o 9 Dezembru loron feriadu. No kontinua debate iha dia 11 to’o 12 Dezembru, nune’e halo aprovasaun iha jeneralidade.

Depois kontinua debate iha dia 13 to’o 22 Dezembru iha faze espesialidade nian ho finál globál, nune’e iha 24 Dezembru. Entretantu, Komisaun C halo ona redasaun finál, depois iha 26 Dezembru, PN bele submete ba Prezidente Repúblika, Francisco Guterres, Lú-Olo hodi halo promulgasaun ka veta depende kompeténsia ne’ebé iha ba Proposta Lei OJE 2019 ho totál biliaun U$ 1.827, ne’ebé osan hirak ne’e inklui ona ho osan ne’ebé atu sosa asoens ConocoPhillips ho valór millaun U$ 350.

Jornalista : Zezito Silva

Editór : Manuel Pinto

HUSIK IDA HATÁN