DILI, (TATOLI) – Servisu Rejistrasaun no Verifikasaun Emprezariál (SERVE) durante períodu janeiru-novembru 2018 konsege rejista kompañia hamutuk 3065.

Supervizora SERVE, Ana Jeánnie Alexandra de Corte Real, informa husi númeru ne’e kompostu husi tipu Empresário em Nome Individual (ENIN) hamutuk 1590, Sociedade Unipessoal Por Quotas Limitada (Unipessoal, Lda) 1070, Sociedade Por Quotas Limitada (Lda) 387, Sociedade Anônima (S.A) 11, Representação Permanente (R.P) 6, no Empresa Pública (E.P) 1.

“Totál husi kedas SERVE eziste iha juñu 2013 mai to’o novembru 2018 hetan 23.842 negósiu no empreza mak rejista iha SERVE”, Ana afirma iha Matadouru ohin.

Aleinde ne’e supervizora ne’e relata tuir relatóriu ne’ebé aprezenta husi unidade rejistu komersiál iha kompañia balun ne’ebé deside taka sira-nia empreza tanba razaun laiha ona atividade atu halo, tuir konkursu mas lamanán, balun halo duni atividade, maibé sente laiha rendimentu maka hamutuk 90 resin.

“Iha 2018 ho impase polítika hanesan implementasaun ba sistema DOT (dotasaun orsamentu temporáriu) iha kompañia barak mai iha ne’e (SERVE) liuhusi sira-nia deklarasaun ofisiál katak sira laiha osan atu kontinua atividade ekonómika”, katak.

Maski empreza balun taka, maibé husi SERVE nia observasaun hatudu iha ema barak ne’ebé iha entuziasmu boot hakarak atu estebalese sira-nia negósiu no kompañia, maibé iha mós ema barak lamenta uitoan tanba lahetan apoiu kapitál husi Governu ou banku no dehan rekizitu husi banku todan uitoan ba sira no rigorozu liu, nune’e lakonsege atubele hetan netik apoiu ruma.

Ana hatutan relativamente serbisu SERVE nian hetan difukuldade balun tanba espasu lato’o atu akomoda funsionáriu hotu nomós sistema ne’ebé SERVE uza ne’e Ministériu Finansas nian tanba sira seidauk iha sistema próriu ne’ebé akomodavel no refletivu ba nesesidade rejistu komersiál nian.

“Ami kontinua ho esforsu ne’ebé maka iha, ami iha ona atributu ne’ebé dezeña tiha ona liuhusi apoiu Banku Mundiál hein de’it atu sosa sistema para bele instala para funsiona, maibé ami kontinua serbisu ho di’ak para atende kliente sira. Mezmu ami laiha sistema própriu, ami konsege loke sukursál tolu ona iha 2018 iha Baukau, Oekusi no Bobonaru. Serbisu agora ne’ebé maka ami halo iha munisípiu tolu ne’e ajuda mós munisípiu sira seluk ne’ebé besik iha área ne’ebá”.

Iha orsamentu 2019 SERVE mós koloka tiha ona prioridade atu loke tan sukursál iha munisípiu hitu mak Aileu, Ainaru, Manufahi, Kovalima, Vikeke, Lautein no Manatutu.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here