Prezidente Autoridade RAEOA, Marí Alkatiri. Imajen/Antonio Gonçalves

DILI, (TATOLI) – Sekretáriu Jerál partidu Frente Revolusionária Timor-Leste Independente (FRETILIN), Marí Alkatiri, hateten timoroan liu-liu lider nasionál sira presiza diálogu no konsensu ba asuntu investimentu hanesan sosa asaun hodi esplora mina no gás, hosi kompañia Conoco Philips no Shell.

Tuir Marí diálogu no konsensu ne’e importante tanba buka atu intende risku saida de’it maka Timor-Leste hetan bainhira sosa asaun.

“Presiza iha diálogu no presiza iha konsensu. Vantajen ba konsensu no diálogu maka aban bainrua ita la dún malu. Ita hotu-hotu simu no ita hotu-hotu asumi responsabilidade. Ne’e de’it maka ha’u husu. Ha’u la husu buat seluk”, Marí dehan liuhusi ninia diskursu iha seremónia Natal Hamutuk iha sede Komité Sentrál FRETILIN (CCF-sigla portugés), Komoro, kinta (27/12) kalan.

Nia tenik, sei iha tempu atu halo diálogu tanba Prezidente Repúblika sei iha fulan ida para bele estuda diploma orsamentu jerál Estadu (OJE) 2019 ne’ebé aprovadu ona iha Parlamentu Nasionál, iha ne’ebé iha OJE ne’e koloka mós orsamentu milliaun $650 atu sosa asaun.

“Sei iha tempu para ita bele túr hamutuk deskuti asuntu ida ne’e. Sei iha tempu atu ita hotu-hotu túr hamutuk atu troka ideia no opiniaun. Uluk ita hamutuk maka manán independénsia no agora tenke túr hamutuk para manán dezenvolvimentu”, sujere.

Iha biban ne’e, líder nasionál ne’e afirma prioridade harii instituisaun no kria sistema tanba Estadu só bele sai Estadu bainhira iha instituisaun no bainhira iha sistema maka instituisaun-sira bele funsiona ho di’ak.

Marí hatutan bainhira tama ba tinan foun (2019) tenke tama ho ideia ka opiniaun ne’ebé klaru katak tenke reforsa órgaun Estadu nune’e bele ezérse nia poder loloos.

“Iha faze konstrusaun Estadu, riin prinsipál Estadu sira nian tenke konstrui para bele dura ba Governu ne’ebé de’it maka atu mai, nune’e garante sustentabilidade ba dezenvolvimentu. Garante dezenvolvimentu ida katak ita-nia oan no beioan aban  bainrua bele hetan benefísiu”, eis Primeiru-Ministru ne’e haklaken.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here