Estudante estajiáriu husi UNTL, UNITAL no ISFIT nomós dosente orientadór sira, konvida no envolve mós jornalista TATOLI, hasai foto hamutuk ho diretór no ekipa RTK. Foto FB: Flora das Neves Fontura.

DILI (TATOLI)-Estudante husi Ensinu superiór tolu hanesan Universidade Nasionál Timor Lorosa’e (UNTL), Universidade Orientál Timor Lorosa’e (UNITAL) no ISFIT (Institutu Superiór Filozofia no Teolojia), Fatumeta-Díli, finaliza sira-nia estájiu profisionál iha Rádiu Timor Kmanek (RTK), Lian Na’in Feto ho Frekuénsia Modulasaun (FM) 98,50 Khz, Díli.

Diretór RTK, Pe. Bento Barros husu ba estajiáriu sira atu kontinua aprende tanba ramata ona estájiu ne’e, nu’udar inísiu ida husi étapa seluk jornada akadémika no moris nian tuir mai.

“Dala balun, ita hanoin, hotu ona étapa ida, iha kontinuidade ba iha étapa ida seluk. Tanba ne’e, ha’u hein katak imi bele aprende buat balun iha ne’e, bele sai hanesan fundamentu, bele sai importante ba imi no imi-nia kareira ne’ebé sei mai,” hateten Ezekutivu RTK, Pe. Bento Barros, iha estúdio RTK, Ponte Maloa-Ailok Laran, Díli, sábadu (22/12) ne’e.

Amu Bento mós espera, estudante estajiáriu sira husi ensinu superiór tolu ne’e katak durante estájiu la’ós de’it aprende kona-ba lala’ok no aplikasaun teória komunikasaun sosiál nian maibé mós iha parte umana nomós espirituál nian tuir karakterístika rádiu katólika ne’e.

“Ha’u hanoin imi bele aprende buat hirak ne’e. Se iha buat ruma iha imi-nia espetativa imi atu hetan depois imi la hetan la’ós katak imi la hetan ona, sei iha tuir mai, sei iha nia tempu. Buat ne’ebé importante mak ita tenke loke ita-nia aan atu aprende nafatin hodi aperfeisoa ita-nia aan iha ita idaidak nia kampu,” hateten Diretór RTK ne’e.

Diretór Amu Bento Barros mós akresenta, RTK iha ona tradisaun ida katak ‘la taka odamatan’ ba timoroan se de’it mak hakarak atu aprende iha fatin ida ne’e.

“Sira ne’ebé aprende iha ne’e, ba tiha, bele mai iha kualker momentu atu aprende tan. Odamatan sempre nakloke ba imi atu mai,” garante Ezekutivu RTK, Pe. Bento Barros ba estudante estajiáriu sira ne’e.

Iha fatin hanesan, Pe. Leandro Maria Alves, nu’udar dosente orientadór ISFIT agredese ba RTK mezmu iha ‘kakuluk’ ida de’it maibé husi instituisaun ne’ebé mak la hanesan, hodi estudante bele aplika teória sira ne’ebé mak sira hetan durante atividade lesionamentu nian.

“Husi teória ne’e, bele hakle’an liután iha vida prátika nian. La’ós de’it atu mai iha rádiu ne’e maibé husi instituisaun ida mai instituisaun ida, atu halo sira koñese malu liután. La’ós de’it ISFIT mak mai iha ne’e maibé husi instituisaun tolu, sira bele koñese malu, bele kria amizade ne’ebé mak di’ak entre instituisaun,” dehan Amu Leandro Alves hodi husu mós deskulpa karik iha aktu ruma ne’ebe komete husi estajiáriu sira.

Enkuantu Dosente Orientadór UNTL nian, Roberto Pacheco, iha biban hanesan, hateten katak lori Departamentu Komunikasaun Sosiál UNTL nian hato’o agradesimentu wa’in ba RTK tanba fó ona oportunidade ba estudante sira hodi aprende.

“Ha’u iha konfiansa katak durante sira estájiu iha ne’e, sira bele aprende buat foun alende sira aprende teória iha universidade ninian,” dehan akadémiku UNTL ne’e.

Profesór Roberto Pacheco mós hateten, durante estudante sira-nia atividade estájiu, iha buat balun ne’ebé karik la monu ba estrutura tomak RTK nian, lori departamentu nia naran hato’o deskulpa tanba  konsidera ita ema dalabarak la sees husi sala.

“Iha parte ami nian, Departamentu Komunikasaun Sosiál nian, ida ne’e la’ós primeiru nomós la’ós mós rohan, atu ba oin sei nafatin, kada tinan, ami husu disponibilidade RTK ninian atu nafatin simu ami-nia estudante sira atu halo estájiu iha RTK,” konklui Dosente Orientadór, Roberto Pacheco.

Iha okaziaun ne’e, reprezentante estudante estajiáriu husi estabelesimentu ensinu superiór idaidak hanesan UNTL reprezenta, João da Costa Soares, ISFIT reprezenta Natalino da Costa Lopes no UNITAL reprezenta Zeferino Soares, mós hato’o obrigadu no agradese ba estrutura makro no mikro RTK nian ba disponibilidade, akompañamentu no orientasaun. Inklui mós husu deskulpa.

“Agradese tebes ba diretór RTK ne’ebé mak simu ona ami-nia karta, ami mai buka no hetan esperiénsia lubuk ida katak tuun ba baze buka informasaun hodi aumenta tan ami-nia esperiénsia. Karik, iha hahalok balun la monu ba instituisaun nia laran, ami husu deskulpa,” hateten reprezentante Estudante Departamentu Komunikasaun Sosiál, UNITAL, Zeferino Soares.

Estudante sira ne’ebé hala’o estájiu iha rádiu katólika, Rádiu Timor Kmanek (RTK), Lian Na’in Feto, ho FM 98,50 Khz ne’e, kompostu husi na’in estudante UNITAL na’in tolu, UNTL na’in lima, ISFIT na’in tolu no na’in ida husi instituisaun independente ida.

Iha ámbitu finaliza estájiu profisionál ne’e, estudante estajiáriu sira husi ensinu superiór tolu mós tara tais ba ekipa RTK nian no ekipa RTK mós fó hikas xapeu RTK nian, haktuir ba tradisaun timoroan sira nian hodi hametin liután relasaun amizade no fraternidade.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here