Prezidente KFP, Faustino Cardoso. Imajen António Goncalves

DILI, (TATOLI) – Komisaun Funsaun Públika (KFP) tuir planu sei halo mapamentu no rekolla dadus kona-ba ema ho kondisaun defisiénsia ne’ebé oras ne’e servisu iha instituisaun públika hodi hetan tratamentu hanesan.

Prezidente KFP, Faustino Cardoso hateten, planu ne’e sei realiza iha 2019, nune’e bele apoiu komisaun atu define politíka ida di’ak hodi asegura tratamentu hanesan ba funsionáriu hotu.

“Hosi mapamentu ne’e hodi hatene loloos karaterístika ema ho defisiénsia hodi sai baze ida ba komisaun atu hamosu polítika seluk hodi asegura tratamentu iha promosaun, rekrutamentu no seluk tan ba satisfasaun”, katak Prezidente KFP iha Villa Verde, ohin.

Komisaun to’o oras ne’e seidauk iha lista funsionáriu ho kondisaun defisiente, tanba seidauk iha mapamentu.

“Ita seidauk iha polítika hodi define loloos ema ho defisiénsia sira”, tenik tan. Tuir nia antes atu implementa politíka mapamentu no rekolla dadus, komisaun sei organiza semináriu ida iha Dili hodi sosiliza polítika ne’e ba públiku.

Polítika ne’e sei kria investimentu ba funsionáriu sira iha kualker oportunidade iha funsaun públika hodi prevene desigualdade no diskrimasaun.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here