Ministru Obras Públikas, Salvador Soares dos Reis Pires. Imajen António Goncalves

DILI, (TATOLI) – Ministru Obras Públikas (MOP), Salvador Soares Pires, dehan tinan ida ne’e ninia parte sei prosesa projetu 300 resin ne’ebé hatama ona pedidu pagamentu inklui fundu infraestrutura  ho projetu liña ministeriál sira ho osan milliaun $1.600.

“Tinan ida ne’e ami prosesa projetu hamutuk 300 resin ba pedidu pagamentu ne’ebé mak tama ona, inklui fundu infraestrutura ho projetu liña ministeriál sira ho milliaun $1. 600 resin, maske restu ladauk hatama pedidiu pagamentu, karik laiha revizaun fíziku iha terenu”, Salvadór Pires ba jornalista sira iha Parlamentu Nasionál, ohin.

Tuir loloos MOP iha totál projetu 500 resin no 100 resin iha liña ministeriál sira, 400 resin iha fundu infraestrutura. nia afirma, ne’e halo pagamentu bazea ba pedidu pagamentu ba kompañia sira, maske restu ne’ebé ladauk hatama pedidu pagamentu karik seidauk iha revizaun projetu iha terenu.

Nune’e, Xefe Governu, Taur Matan Ruak, iha ámbitu debate Orsamentu Jerál Estadu 2019, liuliu ba debate orsamentu MOP nian, husu ba deputadu sira atu labele halo redusaun ba pedidu osan MOP nian, tanba se la’e mak nia implikasaun servisu la la’o, saláriu la iha.

“Ida ne’e lei halo ona, agora tenke kumpre lei de’it, tantu iha buat barak mak ita sei muda, maibé presiza tempu”, argumenta Xefe Governu iha debate espesialidade ba verba MOP nian iha uma fukun, ohin.

Hatutan tan: “Timor-Leste durante ne’e iha problema kualidade obra, tanba uluk ha’u prezidente, perkore timar laran hotu. Problema ne’e mosu tanba ita la iha jestór projetu maibé ita iha ema ne’ebé kontrola, maibé ho periódiku”.

Xefe Ezekutivu dehan tan Nasaun presiza jestór ba projetu hodi halo kompromisu, maibé ida ne’e mós presiza osan hodi selu, hafoin ema bele halo nia servisu di’ak. Maibé ida ne’e mak la iha bele ko’alia tinan 10 mós kualidade obra sei la atinje.

“Ita ema ne’e hanesan animál, diferénsia mak ita rasionál, maibé normalmente rasionál ne’e mós bele fó benefisia ba nia án. Tanba ita la iha kontrolu, nune’e tenke define iha tipu kontrolu nian”.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here