Profesór Filozofia Étika no Polítika Institutu Superiór no Teolojia, Pe. Martinho da Silva Gusmão

DILI (TATOLI)—Profesór Filozofia Étika no Polítika Institutu Superiór no Teolojia, Pe. Martinho da Silva Gusmão, husu ba Prezidente Repúblika, Francisco Guterres Lú Olo, atu hato’o mensajen páz no trankuilidade.

Prinsipálmente leigu ne’e husu Prezidente Repúblika atu foti pensamentu hosi saudozu Nicolau Lobato tanba Nicolau Lobato ko’alia kona-ba fiar ba Maromak maibé Maromak ida ne’e Maromak redentór no Maromak libertadór.

“Ne’e halo ita hanoin didi’ak katak Timor ohin loron hanesan iha tinan 1974-1975 iha ne’ebé ita mosu iha buat ne’ebé Nicolau Lobato hateten ita moris iha momentu ida ne’ebé nakukun. Katak, ita nia ulun hanoin la moos hotu ona no ita nia matan hateke la moos hotu ona. Tanba ne’e, iha Natal ida ne’e, labele aumenta pezu ba tinan 2019,” Amu Martinho ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin enkontru ho Xefe Estadu Lú Olo.

Nia informa katak mensajen Natal ne’ebé hato’o hosi Nicolau Lobato iha tinan 1974 importante teb-tebes tanba apartir mensajen Natal ida ne’e maka Nicolau Lobato luta.

“Iha tinan 1974-1975, sira (lider antigu sira) moris iha ofskurantizmu rasik (nakukun laran). Tanba ho Natal ida ne’e sira ultrapasa depois sira luta to’o ohin loron. Momentu ida ne’e, Nicolau Lobato mate halo tinan 40, se ita mós konsege haree ofskurantizmu ida ne’e, ita mós bele ultrapasa tinan 2019.  Se ita kontinua prinsipálmente “mídia” kontinua sokar tun no sokar sa’e, ita la ba fatin ida. Ita patina iha fatin de’it,” Pe. Martinho afirma.

Maibé, nia dehan, Prezidente Repúblika iha korajen no dehan iha momentu loron tolunulu nia laran ne’e timoroan hamoris espíritu reflesaun, katak, haree ba oinsá maka salva nasaun ida ne’e ho timoroan sira nia forsa tomak.

“Ema barak reza ba Prezidente Repúblika no ema barak maka lakohi atu lider antigu sira ne’e fera tanba bainhira lider antigu sira ne’e fera ita hotu-hotu maka lakon. Signifika katak kuandu kompetisaun ba konflitu ne’e mosu beibeik, entaun laiha ida maka manán no laiha ida maka lakon, maibé hotu-hotu rahun,” nia subliña.

Eis Pároku Parókia Santo António Manatutu ne’e husu ba foin sa’e sira katak bainhira lider antigu sira enfrenta situasaun sira hanesan ne’e, labele tau tan gazolina, maibé buka dalan oinsá lider antigu sira tuur hamutuk halo diálogu atu solusiona problema.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here