DILI, (TATOLI)-Inspetór Jerál ba Inspesaun Jerál Komérsiu Angola nian, Francisco Felix, hatete sai hanesan risku iha baze bainhira halo funsaun lahó laboratóriu tanba halo inspesaun lahanesan ho nia realizasaun, tanba atu sertifika kualidade di’ak ka aat produtu mak sempre ho laboratóriu.
Felix hatete ida ne’e relasiona Autoridade Inspesaun no Fiskalizasaun Atividade Ekonómika (AIFAESA) ne’ebé to’o agora seidauk iha laboratóriu atu garante kualidade hahán ba saúde públika.
“Agora, AIFAESA laiha laboratóriu própria bele husu ajuda laboratóriu husi instituisaun ne’ebé disponivel. Bele uza laboratóriu Saúde nian ou enkuadra elementu saúde nian atu garante realizasaun di’ak inspesaun koerente ida, konkreta ne’ebé permite prosesa, fornese rezultadu ne’ebé justu no garante seguransa alimentár ba populasaun”, Felix afirma iha ámbitu Fórum Inspesaun Seguransa Alimentár no Atividade Ekonómika (FISAAE) nasaun sira ko’alia lia-portugés (CPLP, sigla iha portugés) iha Aitarak-Laran, ohin.
Aleinde ne’e Inspetór Jerál angolano ne’e felisita Timor-Leste tanba agora asume nu’udar prezidente FISAAE no kongratula mós vise-prezidente Fórum ne’ebé eskolla ona.
“Angola membru FISAAE no sempre apoia prezidente hotu ne’ebé hili ona no ladiferente ho Timor-Leste. Prova hatete ami iha ne’e justamente atu garante katak prezidénsia ne’e koroada ba ida ne’ebé merese”.
Kordenadór AIFAESA, Abílio Oliveira Sereno, hatete iha fórum FISAAE ne’ebé halo ba dalimak iha Timor-Leste ne’e katak Angola, Portugál no Timor-Leste sei partilla sira-nia esperiénsia servisu ne’ebé iha país ida-idak nian kona-ba inspesaun ekonómika, kontrolu ba ai-han, métodu saida, uza lejislasaun ne’e kompletu ona ka la’e.
“Lejislasaun ne’ebé ita laiha bele haree iha Portugál, Angola ho membru sira seluk atu kompleta ita-nian. Serbisu balun ne’ebé ita laiha aprende husi sira bele kompleta ita-nian. Ita labele foti sira-nia hotu mai tau iha ne’e tanba realidade lahanesan, maibé ita bele haree buat ne’ebé aplika iha Angola, Kabu-Verde, Mosambike ka Portugál se bele aplika iha Timór, ita aplika hodi bele presta servisu ida di’ak ba konsumidór sira iha ita-nia rai”.
Tanba AIFAESA hanesan membru foun prontu atu aprende no foti liu esperiénsia husi rai seluk atubele hala’o iha Timór bainhira realidade permite atubele fó seguransa ai-han ba konsumidór hotu-hotu.
Iha fórum dalimak ne’e partisipa de’it husi membru na’in-tolu mak Angola, Portugál no Timor-Leste rasik, entantu membru na’in-neen seluk labele partisipa tanba iha kestaun seluk.
Jornalista : Maria Auxiliadora
Editór : Manuel Pinto
http://www.tatoli.tl/2018/12/aifaesa-asume-knaar-nuudar-prezidente-fisaae-cplp/
