Ministru Defeza no mós Ministru Seguransa Interinu, Filomeno Paixão. Imajen/ Antonio Goncalves

DILI, (TATOLI) – Ministru Defeza nomós Ministru Interiór Interinu, Filomeno Paixão, hatete Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) presiza kumpriende ho kle’an oinsá uza arma sira hodi atua situasaun, nune’e la mosu krime ne’ebé rezulta ema mate.

Ministru hato’o kestaun ne’e iha ámbitu reuniaun entre ofisiál superiór sira hosi PNTL no F-FDTL ne’ebé hala’o iha Kuartel Jerál Kaikoli, ohin, hodi haktuir regra sira utilizasaun arma no disiplina militár bainhira uza iha terenu

“Reuniaun ne’e ko’alia kona-ba regra empeñamentu bainhira maka uza kilat no atu tiru ne’e iha ne’ebé, importante para sira bele hatene bainhira maka uza kilat no bainhira labele, uza gás no bainhira labele”, katak tan.

Saida mak akontese, nia dehan membru seguransa sira balun seidauk kumpre regra uza arma, nune’e hamosu krime to’o hamete komunidade. Tanba ne’e, durante mandatu governasaun da-ualu sei uniformiza regra ba instituisaun rua atu kumpre.

Ministru ne’e realsa em termu instituisaun rua ne’e, F-FDTL la’o di’ak ona maibé presiza hadi’a liután maka PNTL.

“F-FDTL hatene ona, nunka tiru arbiru. PNTL sei fraku, balun uza no balun la uza regra, la uza maka impaktu boot ba komunidade kuandu ba festa la lori kilat maibé afinál lori kilat, depois hemu lanu hanesan iha Kuluhun depois taratu tiru ema”, akresenta.

Ba futuru bandu membru PNTL no F-FDTL atu ba uma bainhira la halo servisu ka ferias. “Hatais farda labele hemu tua, buat sira ne’e esplika hotu iha ne’e, maibé ha’u sei bolu nafatin sira atu rona hodi kumpre bainhira la kumpre la’ós soldadu ka ajente maka hetan kastigu maibé ninia komandante mos tenke hetan kastigu no kastigu sira todan liu”, subliña.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here