DILI, (TATOLI) – Ministru Negósiu Estranjeiru no Kooperasaun (MNEK), Dionísio Babo Soares, reprezenta Estadu fahe esperiénsia iha ‘Bali Democracy Forum’ kona-ba valór universál demokrasia ne’ebé metin iha sosiedade timorense liuhusi maturidade polítika husi povu no lider sira ne’ebé hatudu iha eleisaun hirak liubá.
“Liliu estabilidade governasaun ne’ebé rezulta husi eleisaun (livre no justu no nia rezultadu simu husi públiku) importante tebes hodi fó dalan ba dezenvolvimentu ba nasaun no prosperiedade ba nia povu”, refere komunikadu MNEK ba TATOLI, ohin.
Iha okaziaun ne’e, tuir komunikadu ministru sei hala’o enkontru bilaterál ho Ministra Negósiu Estranjeiru Austrália, Senadora Honoravel Marise Payne, Vise-Ministru Negósiu Estranjeiru Venezuela, Ruben Dario Molina, Embaixadór naun rezidénsia rua ne’ebé akredita mai Timor-Leste, Peter MacArthur husi Kánada no Ei Ei Khin Aye husi Myanmar.
Delegasaun hamutuk 500 husi nasaun 91, nomós organizasaun internasionál balun maka partisipa iha BDF ne’e.
Delegasaun Timor-Leste inklui mós Embaixadór Timor-Leste ba Indonézia, Alberto Carlos, Diretór Sudeste Aziátiku no Oseania, Lisualdo Gaspar, Konsul-Jerál Timor-Leste iha Bali, Elda Fereira, nomós ofisiál sira husi MNEK.
Atividade ‘Bali Democracy Forum’ akontese ba dala-11 (BDF XI, sigla Inglés). Ofisialmente loke husi Ministra Negósiu Estranjeiru Repúblika Indonézia, Retno L.P. Marsudi, no konvidadu espesiál (guest of honor), Prezidente no Ministru Negósiu Estranjeiru Nauru, Baron Divavesi Waqa, MP.
Depois sesaun abertura, Ministru Deonísio Babo Soares, hamutuk ho Prezidente no Ministru Negósiu Estranjeiru Nauru, Baron Divavesi Waqa, Ministra Negósiu Estranjeiru Austrália, Senadór Honoravel Marise Payne. Inklui, Ministru ba Povu Pasífiku Nova Zelándia, Hon. Aupito William Sio, Yongmei Zhou, husi Banku Mundiál no Donald K. Emmerson husi Stanford University, sai panelista ba sesaun diskusaun plenaria dahuluk ho sub-tema “Making Democratic Institutions and Inclusive Prosperity Sustainable”.
Ministru Babo mós halo intervensaun iha Debate Jerál (General Debate) BDF XI ne’ebé relasiona ho tema Demokrasia ba Prosperiedade (Democracy for prosperity) ne’e.
Jornalista: Rafy Belo
Editora: Rita Almeida
