DILI, (TATOLI) – Prezidente Repúblika, Francisco Guterres Lú Olo, no Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, preokupa situasaun seguransa atuál iha nivel nasionál.
Ulun boot nasaun na’in rua preokupa, liu-liu ba baku membru F-FDTL iha Likisa (semana kotuk), tuda polísia iha Komoro (semana kotuk), kazu hana malu, sona malu no oho malu entre joven iha Dili no iha munisípiu balun.
“Prezidente nia preokupasaun hanesan mós ha’u nia preokupasaun. Maibé, Prezidente Repúblika mós dehan fó ánimu no fó barani nafatin ba ita-nia polísia nasionál atu labele dezanima atende problema rai laran”, Lere ba jornalista sira iha Palásiu Prezidente Nicolau Lobato, Bairru Pité, kuarta ne’e hafoin relata situasaun seguransa ba Xefe Estadu.
Tuir nia situasaun ne’ebé ohin loron akontese ne’e diferente ho situasaun tinan uluk no konsidera katak ema sira ne’ebé kria instabilidade ne’e uluk lakohi ukun án, tan ne’e di’ak liu marjinaliza tiha no la serve moris iha Timor.
“Polísia nu’udar aparelu Estadu ninian, maibé ita tau liman ba sira beibeik. Sala ne’e sala ona. Labele lori sala ida ba rezolve fali sala seluk”, Lere realsa.
Kona-ba artes marsiais, nia hatán, komesa reativa fila fali, maibé nia dehan lei nú. 5/2013 kona-ba taka artes marsiais no arte rituál sira hanesan PSHT, Kera Sakti, KORK no Sete-Sete kontinua vigora.
Ne’e duni, Lere afirma polísia sei atua iha kualker momentu bainhira ema ruma viola lei refere (nú. 5/2013).
“Natal no Tinan Foun mai ne’e ha’u konta katak problema sei mosu, maske nune’e, polísia no Forsa Armada la toba. Purke, uluk ita funu tanba atu halakon funu, maibé agora ita ukun án ona ne’e ita hakarak tan saida”, katak tan.
Eis Komandante Gerileiru ne’e apela ba juventude no komunidade tomak katak Timor ohin loron ne’e ukun án ona, tan ne’e tenke buka respeita malu, respeita liberdade ema ida-idak nian no hadomi malu atu lori nasaun ne’e ba oin.
Lere rekoñese iha ona tentativa atu rezolve problema balun iha instituisaun seguransa, pur-ezemplu iha parte polísia nian sei halo kontrolu ba armamentu no ida ne’e sein dúvida katak Komandu PNTL sei kontrola hanesan Komandu F-FDTL kontrola armamentu iha nia membru sira.
Jornalista: Xisto Freitas
Editora: Rita Almeida
