DILI, (TATOLI) – Eis Primeiru-Ministru, Kay Rala Xanana Gusmão, ohin vizita eskola bázika sentrál Farol, hodi husu ba estudante sira atu estuda maka’as nune’e bele hetan rekursu umanu kualifikadu.
“Estudante sira tenke estuda maka’as hodi lori Timor ba oin”, katak Xanana ba estudante sira durante sorumutu.
Xefe Negosiadór Prinsipál ba Ketan Tasik ne’e afirma jerasaun foun iha responsabilidade boot ba futuru nasaun bainhira jerasaun tuan entrega responsabilidade, tanba ne’e tenke preparadu.
Nune’e mós Diretora EBS Farol, Irene Soares Morais, onradu ho prezensa ne’e hodi motiva liután estudante sira hodi estuda.
“Ha’u kontente ho prezensa Xanana nian hodi rona mos ami nia preokupasaun”, hateten dirijente eskola ne’e.
Eskola ne’eeinfrenta menus sala aprendizajen tanba ne’e liuhosi vizita ne’e relata mós ba eis xefe governu hodi transmite ba ministériu edukasaun.
“Xanana responde katak sei ko’alia ho ministra edukasaun para haree asuntu ne’e”, katak nia.
Alunu rihun 2.365 maka oras ne’e eskola iha eskola ne’e, maibé sala aprendizajen la sufisiente ho totál profesór 77.
“Sala aula la sufisiente tanba ne’e ami koloka estudante kada sala 60, espera governu aumenta sala aula”, direta hatutan.
Jornalista: Agapito dos Santos
Editora: Rita Almeida
